Arctic Circle Race ullormik ataatsimik ilanngarneqarpoq

- Sila allanngortissinnaanginnatsigu ACR-imilu isumannaallisaaneq annertummat, pilersaarutit allanngortittariaqarpagut. Kangerlussuarmi silasiorfiup paasinarsisippaa ullup ingerlanerani anorip sakkortusisarsinnaasoq annertuumillu apilluni. Anorliliallakkuni ersittueruttussaammat arpaffigissallugu ulorianarpallaassalluni, aalajangerpugut ullumikkut unamminissaq taamaatinniarlugu.

Ilimasaarutigineqarpoq aqagu sapaatiuppallugu silagissasoq. Ulluni taakkunani aqqutissaq nalilersussavarput akuerineqarsinnaappallu arpaffigineqassapput.

Ullut pingasut arpattoqartussaagaluartoq ullut marluinnanngornissaat ilimanaateqarsinnaavoq, tamannalu ilaasa pakatsissutigissavaat, kisianni pingaaruteqarnerpaavoq isumannaallisaaneq. Nunap timaanarsuani arpattussaapput qatsissutsillu assigiinngitsut aqqusaartussaallugit. Maannakkorpiaq sila taamaannerani qatsissumut pigunik isigisaarutiviusattussaapput, tamannalu illersorneqarsinnaanngimmat arpattoqassanngitsoq aalajangerparput.

Allatut ajornartumik arpaffissap naalineqarnissaa ilimagineqarsinnaavoq, ataasinngorneq arpaffissatut ilanngutissagaluarutsigu peqataasullu arlallit ataasinngorpat nunaminnut angerlartussaallutik. Taanna pissusissamisoorpallaanngimmat ullut marluk unammisoqarnissaa ilimanarneruvoq, Arctic Circle Racemi siulittaasoq Jens Klaus Lennert oqarpoq.

Arctic Circle Race-ip ulluni tulliuttuni qanoq ingerlanniarneqarnera pillugu annertunerusumik paasisaqarusukkuit, KNR-TV unnugu nalunaaqqutaq qulingiluanut ammariannguariuk.