Arctic Circle Race silarput mannguumaniaraluaqisoq taamaatinneqarani ingerlanneqassaaq

Nunarsuarmi ujakkaarluni unamminerit sakkortunersaat – Arctic CircleRace – silarput ulluni makkunani mannguumaniaraluaqisoq taamaatinneqarani ingerlanneqassaaq. Aaqqissuisut taama neriorsuipput, naak piffissami kingullermi sila peqqutigalugu Sisimiut eqqaanni suut tamangajalluinnarmik masannguullutik aatsitilersimasut takuneqarsinnaasoq.
Allattoq Karsten Sommer, Nutaarsiassaqartitsivik / Nyhedsredaktionen
marsip 20-at 2013 05:55

 

Soorluluuna  ilimagerpiarneqanngitsoq tikittarfiusarlunilu apuuttarfiusartoq Nalunnguarfiup Tasia Arctic Circle Race aprilip tallimaanni ingerlanneqalerpat sikoqqissimalissasoq.

- Aallartarfik tikittarfillu nuulersaarparput tasermiit nunataanut, kiisalu Tupeqarfik Camp unammeqataasut unnuiffissaat illoqarfimmut qaninnerusumut nuussavarputtaaq. Taanna Sisimiuniit 10 km-sut ungasitsigisumi inissilersaarparput, taamaalillutattaaq assartugassat oqimaatsut ajornartorsiornannginnerusumik ingerlassinnaaniassavagut,  Arctic Circle Race-mi siulittaasoq Jens Klaus Lennert oqarpoq.

- Sulili sap. ak.-ri pingasut piffissaqarepugut, silalu allanngorluinnarsinnaavoq aamma. Unammeqataaniarlutillu nalunaartut 177 sapinngisannguarput tamaat pakatsisinnaveersaarniaraluassavagut,  Lennert erseqqissaavoq.

- Allatulli ajornavissumik Arctic Circle Race imaliliorluni suna tamarmi masannguussimasoq ingerlattariaqalissappat taamaannera nittarsaassinermi oqaatigisartakkatsinnut timitaliissutaaginnassaaq aamma, oqartarattami Arctic Circle Race nunarsuarmi ujakkaarluni sukkaniunnerit sakkortunersarigaat, Jens Klaus Lennert naggasiivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq