Arctic Circle Race piareersarneqalereersoq

Massakkumiit qaammatit sisamat qaangiuppata ukiut tamaasa Sisimiuni pisalersoq Arctic Circle Race, nunarsuarmi sisorarluni oqilanniunnerit sakkortunersaattut nunani tamalaani tusaamasaasoq ingerlanneqassaaq.

Siornalu Arctic Circle Raceqartarneraluni ajugaasut aappaariit nunatsinneersut Uiloq aamma Øystein Slettemark ilaaniarlutik nalunaareersut, oqilanniunnissarsuarmi aaqqissuisut nalunaarput.

Aamma nunani allani sisoraatinik arpaaserlutik oqilanniuttartut tusaamasat russeq Vladimir Smirnov aamma tyskeq Sven Fischer ilaanissamut qaaqquneqartut, aaqqissuisut ilisimatitsipput.

Aappagu qulingiliassaannik Arctic Circle Race-qarnissaanut piareersarnerit maanna aallartiaarput, tamatumunngalu siorna unamminerit sioqqutilaarlugit anorersuarneratigut atortut amerlasuut annaaneqarnerat pissutaasoq, aaqqissuisut ilisimatitsipput. Siornalu atortut annaaneqartut taarserniarlugit maanna aningaasassarsiornermi 150.000 kronet Nuna Fondtimit aningaasaliissutigineqarsimapput, taamaalillunilu tammaarfissamut atortussanut aningaasartuutissat matussuserneqartut, aaqqissuisunit oqaatigineqarpoq.

Aappaagu Arctic Circle Raceqarnissaanut arpaffissami aqqutissaq aamma piareersarneqalereersoq, aaqqissuisut oqaatigaat.