Arctic Circle Race piareeriartorpoq
Sisimiuni ukiut tamaasa pisalersumik Arctic Circle Raceqarnissaanut qaammataannanngorpoq. Arctic Circle Race aallartisaaaq 8.apriil. Sapaatit akunneri kingulliit eqqaassagaanni assut issangiaqattaarpoq sialleqattaaqaluni sumiiffinnilu arlaqartuni issisiutip 0-li angulaaginnaqattaarlugu. Taamaattorli Sisimiut imaatungaanni Arctic Circle Raceqarfissami aput aappiarsimanngimmat unammersuarnissaq piffissaq eqqorlugu ingerlanneqassasoq, aaqqissuisut nalunaarput.
Ukioq manna Arctic Circle Raceqarnissaq unammisarnerni tamanit sakkortunerpaasussatut nalilerneqarpoq, aallaavissap qutsiartorsuarmiinnissaa tassa sissamiit 500 meterinik qutsinnerusumiinnera pissutigalugu.
Unamminissamullu peqataaniarlutik allatsissimasut aamma imaannaarpalunngillat, tassa nunarsuarmi sisoraatinik ooqattaasartartoq pissartaasartorlu tyskeq Sven Fischer ilaaniarpalummat. Aamma danskit TV-kkut sisorarneq pillugu aallakaatitassiortartuat Thomas Uhrskov kiisalu nunatsinneersut Uiloq aamma Øystein Slettemark kiisalu Martin Møller peeraalu Johanne Mikkelsen ilaassasut, Arctic Circle Racemik aaqqissuisut nalunaarput.
