ARKIVAssi: ACR/Aalut Lennert

Arctic Circle Race marloriarlugu aallartinneqartoq

Arctic Circle Race tallimanngornermi ullaap tungaa pilersaarut malillugu nuannersumik aallartippoq. Unammeqataasussalli sisamat nalinginnaavallaanngitsumik aallartipput. Taakkua unamminerup ullaakkut qulinut aallartinnissaanut inortuigamik aallarteqataanngitsoorput.

- Nuanneqaaq. Ullumikkut aamma silageqaagut. Seqinnarippoq nillataalaarlunilu immaqa -20 gradit missaanik issippoq. Aallartiffimmut isiginnaariartut 4000-it missaanniikkunarput, amerlanerunngikkunik, ACR-ip siulittaasua, Jens Klaus Lennert KNR-imut ullup qeqqanut oqarpoq.

Ukioq manna peqataasussanit 106-iusunit sisamat ullaaq manna Sisimiunut suli tikissimanngillat, taamaammat aallartinnissamut piareersimanatik.

AAMMA ATUARUK OL-imut peqataasimasut arlallit Arctic Circle Racemi peqataaniarlutik nalunaarsimapput

ACR-ip siulittaasuata, Jens Klaus Lennertip ullup qeqqanut oqaatigaa unamminermut siulersuisut tallimanngornerup ualikkuani aaqqiissutissarsisimasut.

- Timmisartoq ullup qeqqata tungaani tikinniartoq nalunngeriaratsigu, sillimaniarnermut ataatsimiititaliaq aalajanngiisartullu ataatsimeeqatigaagut, unammisussallu kingulliit kingusinnerpaamik 11.30 aallarsinnaassasut aalajangerlutigu, Jens Klaus Lennert oqarpoq.

AAMMA ATUARUK ACR GM-imit Europamilu unammisunit unammillerneqartoq

Unammeqataasussat amigaataasut timmisartumik Sisimiunut 10.45 tikipput, sisamaasuniillu pingasut 11.30 unammillutik aallartut, siulittaasup oqaatigaa.

Taamaalilluni ACR aallartilluinnarpoq sapaatiuppallu naammassineqassalluni.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat