Arctic Circle Race aatsaat taama angitigisoq aaqqissuukkuminaattoq

Ingerlaarfissat qaqqanut nuunneqarsimapput ACR-illu tammaarsimaarfia illoqarfimmut qaninnerusumut inissinneqarsimalluni. Tamannalu pissutigalugu ingerlaarfissanut nunap assingini imermillu agguaassisarfiit inissisimaffissaat inaarutaasut suliarineqarnerat suli naammassineqarsinnaasimanngillat.

- Ukiormanna aaqqissuinissaq ajornakusuulaarsimavoq, kisianni angumerissaqqaarparput, aamma Igloo Mountainip løjpet suliarai ACR-illu ikiorterpassui suliaqaannaavillutik. Sliassat amerlanerunerat akikitsuinnaanngilaq, KNI A/S-illu anguniakkatta angunissaanut aningaasaliissuutini 100.000 kr.-inik aningaasaliiffigeqqippaatigut, ACR-imi siulittaasoq Jens Klaus Lennert oqarpoq.

Arctic Circle Race Nunatsinni aaqqissuussinerit anginersaraat inuiaqatigiinnullu nioqqutaalluni immikkuullarissoq. Aaqqissuussineq ukiuni kingullerni 17-ini nunatta nittarsaanniarneqarneranut pitsaalluinnartuusimavoq, aaqqissuisullu neriuutigaat ukiorpassuarni suli taamatut ingerlassasoq, suliffeqarfinnit naalakkersuinikkullu tapersersorneqaannarluni.  

- Nammineq kajumissutsiminnik sulisut amerlagaluartut suli akisuupilussuuvoq. Aningaasaliisoqanngitsuuppat Arctic Circle Race ingerlanneqarsinnaassanngikkaluarpoq. Ukiormanna kingumut nunarsuarmit tamarmit soqutigineqarluarpoq. Peqataasut nunanit 16-ineersuupput tamannalu rekordiliineruvoq, Jens Klus Lennert oqarpoq.

Peqataasussat allattorsimaffii acr.gl-imi atuarneqarsinnaapput, sukkaniunnermini ingerlaavartumik taakku nutarterneqartarput nunarsuarmi sumiikkaluaraanniluunniit malinnaaffigineqarsinnaallutik.