Arctic Circle Race 2014 qanillivoq

Kilometerinut 160-inut ukiumoortumik ujakkaarluni oqilaniunneq, Arctic Circle Race, tallimanngorpat aallartissaaq. Ujakkaarluni oqilaniunneq Sisimiuni aallartissaaq nunallu timaanut ingerlaartoqassalluni. Jens Klaus Lennert Arctic Circle Racemeersoq taama ilisimatitsivoq.

Ujakkaarluni oqilaninnerit nunarsuarmi avannarpasinnersaat
Ujakkaarluni oqilaniunneq qaasuitsup killeqarfiata avannaatungaani kilometerinik 65-it miss. ungasitsigusumiippoq, taamaasillunilu ujakkaarluni oqilaniunnerit nunarsuarmi avannarpasinnersaralugit. Ujakkaarluni oqilaniunneq sakkortooq nunani tamalaanit soqutigineqartupilussuuvoq peqataasullu nunanit allaneersut tusaamasat ukiut tamaasa peqataasarput.

Tusaamasanik peqataasoqassaaq
Sisoraaserluni ooqattaasartartoq sloveniamiu Anastasiya Kuzmina, Sotjimi ukiormanna OL-ertoqarnerani Vancouverimilu 2010-mi kuultinnattoq ukiormanna peqataassaaq.

Aammattaaq Martin Møller nunatsinneersoq, Sotjimilu OL-ertoqarnerani aamma peqataasoq, piareersimalluinnarluni peqataaniarpoq. Martin Møller, siorna Arctic Circle Racertoqarnerani ajugaasuuvoq.

Naammassiniagassat annertuut
Peqataasut ingerlaarfissaat kilometerinik 160-inik isorartutigisoq, ullut pingasuinnaat atorlugit ingerlaarfigineqassaaq, taamaammat ujakkaartartut ulluinnarsiutiginngilluinnakkaminnik naammassisassaqarput. Ujakkaartartunuinnarli tamanna atuutinngilaq. Namminermi kajumissutsiminnik suleqataasut 160-it, pingaartumik Sisimiuneersut, oqilaniunnerup ingerlanneqarnerani suleqataapput.