Arctic Circle Race 2013 naammassivoq
Peqataasut katillugit 173-it nunanit 14-ineersut ajugaaniupput, silarsuarmili sisoraaserluni oqilaniunnerit sakkortunersaata naammassinissaa salliutinneqarpoq, peqataaasummi timersornikkut killissartik ullut pingasut ingerlanerini aamma ilikkagaqarfigisarpaat.
Unammisut arlallit uniinnartariaqarsimapput imaluunniit ACR 160-imit ACR 100 km.-imut nuullutik.
Orlorujussuartut aamma arlaqarsimapput, qujanartumilli niuminnik taliminnillu napisooratik, taamaattorli ataarutiminnik ajaappiaminnillu napisoorsimallutik. ACR-imut tunngatillugu sillimaniarneq pitsaalluinnartuusimavoq, ilaatigut najukkami qamuteralaatillit klubbiat politiillu suleqatigineqarsimallutik, taakkumi Ujaasinermi Annaassiniarnermilu immikkut piareersimasuutitaqarsimapput kiisalu ACR-ip ingerlanneqarnerani assartuineq isumagisimalluni.
- ACR 2013 siornatigut naammattoorsimanngisatsinnik unamminartortaqarsimavoq. ACR-imili suleqatigii kingumut takuteqqippaat unamminartut aaqqinniagassaannaasut. Ikiuussimasut tamaasa tulluusimaarutigeqaakka. Taamaammat aamma ACR-ip suli ukiorpassuarni ingerlanneqartarnissaa qularutiginngilara. Nunanit allanit ukiormanna peqataasut 60-it missaaniipput, siunissamilu nunanit allaneersut suli amerlanerusut silarsuarmi sisoraatinik sukkaniunnerit sakkortunersaannut peqatasarumaarnissaat neriuutigaarput, Arctic Circle Racemi siulittaatoq Jens-Klaus Lennert oqarpoq.