Arctic Circle Islandimi ullumi aallartippoq

Inuit 1800-nit amerlanerusut Arctic Circlep ataatsimeersuarnissaani peqataassapput, Islandillu præsidentia Olafur Ragnar Grimsson ataatsimeersuarneq ammarlugu oqalugiassaaq. Monacop kunngissaa Albert, Quebecip ministeriunerunera Philippe Couillard, Frankrigillu præsidentia Hollande peqataassallutik. Hollande, EU-mi nunat assigiinngitsut naalakkersuinikkut siuttuisa ataatsimiinnerannit toqqaannartumik Islandiliassaaq.

Artur Chilingarov, Ruslandip præsidentia Vladimir Putin sinnerlugu oqalugiartunut ilaassaaq, soorlu aamma Pinngortitaq pillugu nunarsuaq tamakkerlugu suliniaqatigiiffiup Verdensnaturfondenip qullersaa Carter Roberts, Inuit Issittormiut Siunnersuisoqatigiiffiata Canadami siuttuat Okalik Eegeesiak oqalugiartunut ilaassasut, Kinallu nunanut allanut tunngasunut ministeria Wang Yi, isiginnaarutitigut toqqaannartumik aallakkaatinneqartukkut Kinamit oqalugiassasoq.

Politikkikkut oqalliffik Arctic Circle, Issittumut tunngasunut oqallittarfinni nunarsuarmi annerpaanngornikuuvoq, nunat 50-it pallillugit ukiumoortumik ataatsimeersuartoqartarnerani peqataatitaqattarlutik.