Arctic Circle Assembly aqagu aallartissaaq
Arctic Circle Assembly Reykjavikkimi sisamassaanik ingerlanneqalerpoq. Issittoq pillugu ukiumoortumik ataatsimeersuartarnerit akornanni ukiualuit ingerlanerini annerpaalerlunilu sunniuteqarnerpaalerpoq.
Ataatsimeersuarneq Islandip ukiorpassuarni præsidenterisimasaanit Olafur Ragnar Grimssonimit aaqqissuunneqarpoq.
Arctic Circle Assemblymi ataatsimeersuaqataasartut ukiut tamaasa amerliartorput.
Ataatsimeersuarnermi peqataasartut nunarsuarmi sumiiffinnit assigiinngitsuneersut 2000-it sinneqartut ukioq manna peqataassapput. 400-ullu sinneqartut Issittumi umiarsuarnik angallannermiit silap pissusiata allanngoriartorneranut tunngasunik saqqummiussissallutik.
Niuernissamut periarfissat, umiarsuit angallavigisartagaat aamma ilisimassarsiornissamut suliniutit nutaat kiisalu takornariat nunat assigiinngitsuneersut Issittumut soqutiginninnerat annertunerulernikuulluni. Isumalluutillu ikinneqaat, kuultit uuliat naturgassillu.
Niuerniat, politikerit, issittup inui, ilisimasassarsiortullu issittumut soqutiginnittut amerlapput.
Ataatsimeersuarnermi peqataasut amerlannerannut takussutissaavoq issittup nunarsuarmut sunniuteqariartornerata annertussusia.
Ataatsimeersuarnermi oqalugiartussat pingaarnersaat tassaavoq Naalagaafiit Peqatigiiffiit qullersaat Ban Ki Moon aamma Skotlandimi ministeriuneq Nicola Sturgeon ataatsimeersuaqataasalluni.
Nunatsinniit Namminersorlutik Oqartussaniit Ilisimatusarfimmiillu peqataasoqassaaq.