Arctic Cat-it iluarsaassassat

Allattoq Mads Lynge
septembarip 20-at 2006 10:53

Qamuteraalat snescooterit Arctic Cat-it, USA-meersut, 50.000-init amerlanerusut, Arctic Cat-imut utertinneqartussanngorput, iluarsaanneqartussaallutilluunniit.

Qamuteralaat pineqartut ukioq 2002-miit ukioq manna ilanngullugu nunatsinni tunineqarsimasunut ilaapput, aquutitaasalu atortuisa ilaat ajoquteqarsimammat iluarsaanneqartussanngorput.

Ajoqutaasoq iluarsineqanngippat qamuteralannik aqutsisinnaajunnaartoqarsinnaavoq. Arctic Cat taama nalunaaruteqarpoq.

Arctic Cat-it 2002-miit maannamut nunatsinni tunineqarsimasut 40-t 50-illu akornanniittut, Sisimiuni Arctic Star ApS, Arctic Cat-inik tuniniaasartut ilisimatitsipput.

Arctic Star-ip pisortaa Henrik Sachse oqarpoq qamuteralaat pineqartut sapaatit akunnerisa marluk ingerlanerini iluarsaallugit aallartinneqarsinnaassasut, atortussat kingoraartissaat tikeriarpata.

Qamuteralaatiminnik ingerlaartillutik aqutsisinnajunnaarsimallutik nalunaarsimasut maannamut 42-ruusimapput, ajoqusersimasumilli suli nalunaaruteqartoqanngilaq.

Qamuteralaatinnut tunngasumik apeqqutissaqaruit, USA-mi Arctic Cat-imut sianerlutit paasiniaasinnaavutit.

Arctic Cat-ip USA-mi normua: + 800 - 279 - 6851