Arctic Base Supply nutaamik pisortartaarpoq
42-nik ukiulik Jens Panum Have Arctic Base Supply-mi pisortaanertut januaarip aallaqqaataani atorfinippoq. Taassuma taarserpaa Steen O. Hansen isumaqatigiissutaareersut malillugit Danborimmi atorfimminut utertoq. Danbor Arctic Base Supplymik piginneqataavoq.
Jens Panum Have uuliasiortunik sullissinermi misilittagaqarpoq siornatigut Hoyer Denmarkimi pisortaasimagami taakkulu ilaatigut uuliarsiortunik kiffartuussisarput.
Taanna niuertarfiit Aldimik taaguutillit ataqatigiissaarinermut pisortaaffigereerlugit Nuummut nuuttussanngorpoq. Taannali pitinnagu Danborimi Esbjergimiittumi suliassaminut sungiusaqqaarallassaaq tamanna pereerpat februaarimi Nuummut nuussalluni.
- Uanga ilimagilluinnarpara Jens Panum Have angutaasoq atorfimmut tulluarluinnartoq Steen O. Hansenip ukiumi kingullermi suliffeqarfimmi suliaasa annertuut nanginnissaannut piukkunnarluinnartoq, Arctic Base Supply’mi siulersuisut siulittaasuat Niels Clemensen oqarpoq.
