Arabiamiut: Danskit nioqqutaat naamik!

Muuamaamik upperisallit ajuallatsinnerat akikitsuunngitsoq danskit suliffissuaqarfiisa kattuffianni naatsorsuinerup takutippaa.

Jyllands Postenip muuamaat ilaarlugu titartakkat saqqummersitai akerliuffiginiarlugit nunani arabiamioqarfiusuni danskit nioqqutissaannik killilersuisoqarpoq.

Nunani taakkunani killilersuisoqarmat danskit nioqqutissiai nunanut taakkununnga eqqussuunneqartut 15 procentimik appariarput.

Muuamaat ilaarlugu titartakkat Jyllands Postenip siorna saqqummersimmagit Muuamaamik upperisallit aalassangaatsiarput; danskit nunani allani aallartitaqarfii ikuallanneqarput danskillu nioqqutissiaannik killilersuisoqalerluni.

Danskit suliffissuaqarfiisa kattuffianni siunnersuisartut pisortaat tamanna pillugu ima oqarpoq:

- Suliffissuit ileqqorlunneri peqqusiullugit killilersuinerit tusartareerpakka. Uanili pisumi, upperisaqaqatigiit aviisillu aaqqiagiinnginneranni, danskit suliffissui pisuussuteqaratik eqqorneqarput, kattuffiup siunnersuisartuisa pisortaat taama oqarpoq.

Danskit nioqqutissiai nunanut arabiamioqarfinnut eqqussuunneqartut 935 million koruuninik annaasaqarfigineqarput, allatulluunniit oqaatigalugu ukioq manna qaammatini tallimani siullerni nunanut taakkununnga eqqussuineq 15 procentimik appariarpoq.

Arlap nioqqutissaatai killilersorneqartunit tamanit eqqorneqarnerpaapput.

- Nioqqutissaatigut erseqqilluinnartumik Danmarkimeersuusut takuneqarsinnaavoq. Tamannalu pissutigalugu eqqussuinerput malunnaatilimmik appariarpoq. 400 million koruunit angullugit annaasaqarpugut, Arlami tusagassiortunut attaveqartartut pisortaat taama oqarpoq nangillunilu:

- Arla nunanut arabiamiunut eqqussuisunit annerpaavoq, immussuit immuillu Saudi-Arabiamut eqqussortarpai. Arlap Saudi-Arabiamut ukioq manna qaammatini tallimani siullerni eqqussuinera 40 procentimik appariarpoq. Maannali ilorraap tungaanut saakkiartorpoq.