Aqutsiveqarfiit ullumimit atuutilersumik nutaanik malittarisassaqalissapput
Allannguuteqarnerit kingunerissava aqutsiveqarfioreersuni pisassiissutaasimasut ilanngarnagit aalisartoqarsinnaalissaaq.
Aqutsiveqarfiit killeqarfiisa allanngortinneqarnerinut allaaserisaq Namminersorlutik Oqartussat nittartagaanni nanoq.gl-imi aaneqarsinnaavoq imaluunniit Qaatsuitsup Kommuniata allaffeqarfiini taamatullu nunaqarfiit allaffeqarfiini.
Akuersissuteqareersunut sunniuteqassanngilaq
Allannguut akuersissuteqareertunut sunniuteqassanngilaq, soorlu aamma akuersissutinik nutaanik pisoqassanngitsoq, aalisarnermut piniarnermullu naalakersuisoqarfik tusagassiuutinut nalunaarutaani taama allassimavoq.
Inatsisartunut ilaasortaq Karl-Kristian Kruse Upernavimmi, Uummannami aamma Qeqertarsuup Tunuani aqutsiveqarfiit allanngortinneqarnissaannik aalajangiinissamut Inatsisartut upernaaq manna ataatsimiinneranni siunnersuuteqarpoq.
Siunnersuut tunngavilersorneqarpoq aalisarnermik sakkortuumik aqutsinerup kingunerisaanik qaleralinniarnerup ukiup ilaani unitsinneqartartoq, taamaammallu ingerlaavarnerusumik aalisartoqarsinnaaqqullugu iliuuseqarnissaq pisariaqartinneqarluni.
