Aqutsisut kommunalbestyrelsep piumasaqaataanik naammassinnissimanngillat

Kommunalbestyrelsip kommunip karsiata ikinnerpaamik kaaviiaartitat 7 procentiinik imaqarnissaanik piumasaqaataa pissutigalugu Kommuneqarfik Sermersooq nakkutigineqalerpoq.
Allattoq Thora H. Nielsen
marsip 07-at 2014 04:37

Siorna ukiup naanerani 48 million koruuninik amigartoorneq peqqutaalluni Kommuneqarfik Sermersooq karsimiittuutiminik tigusisariaqarsimavoq, tamatuma malitsigisaanik karsimiittuutit sinneruttut 23 million koruuniinnanngorsimallutik.

Kommuneqarfik Sermersooq sukannersumik nakkutigineqalersoq

Taakkuli karsimiittuutit naammanngillat, kommunalbestyrelsemmi 2012-imili piumasarisimavaa karsimiittuutit kaaviiaartitat ikinnerpaamik 7 %-iimik amerlassuseqassasut. Tamanna naammassineqarsimasuuppat karsimiittuutit 100 million koruuniusimassagaluarput 23 million koruuniunatik. Aningaasat naatsorsuutigisamit ikinnerummata kommune Namminersorlutik Oqartussanit sukannersumik nakkutigineqalerpoq kommunelu sipaarniartariaqalerluni.

Kommunalbestyrelsep piumasaqaataanik naammassinnissinnaasimanatik Kommuneqarfik Sermersuumi Aningaasaqarnermut Sulisoqarnermullu Kiffartuussivimmi pisortap Mette Kesselip nassuerutigaa.

Aningaasarsiassat soorlu A-skat, soraarnerussutisiat aamma feeriapenget qangali tunniunneqartussaasimagaluit kommunep 2013-imi akilertariaqarsimavai, taakku ilaat kommunet kattunneqanngikkallarmatali akiligassaasimapput.

Karsimiittuutit 23 million koruuniinnaanerannut peqqutaatinneqartut aamma ilagaat kommunep inissianik attartortumit piginnittuulernermut tuniniaanermini isertitarisimasani 26 million koruunit inatsisit malillugit kiisalu kukkunersiuisut peqqusinerattut kontomut aalajangersimasumut ikisimanngimmagit, karsimiittuutinulli tigoriaannarnut ilanngullugit ikisimallugit.

Aningaasat taakku inissialiornermut kiisalu inissianik aserfallatsaaliinermut taamaallaat atorneqarsinnaapput. Mette Kessel aperaarput karsimiittuutit qaffasitsiniaannarlugit ilaneqaannarsimannginnersut.

-Taanna imaaliillarlugu akineqarsinnaanngilaq. Karsimiittuutinik decemberip 31-ani naatsorsuisarneq pissusissamisoornersoq apeqquserneqarsinnaavoq oqaluuserineqarsinnaallunilu. Taamaaliortarneq ingerlatiinnarneqassava imaluunnit ukiup ingerlanerani agguaqatigiissillugu karsimiittuutit naatsorsorneqartassappat, isumaqarpungalu agguaqatigiissillugu naatsorsuisarnissaq pitsaanerugaluartoq.

Kommuneqarfik Sermersuumi Aningaasaqarnermut Sulisoqarnermullu Kiffartuussivimmi pisortaq Mette Kessel aamma ilisimatitsivoq kommunalbestyrelse apriilimi ataatsimiilerpat pissutsit pillugit nassuiaanneqassasoq.