Aqutsisoqarfiup pisortarisimasaa: Politikerit peqqinnissaqarfimmut pivisiusorsiunngitsunik naatsorsuuteqarput
Kalaallit inuiaqatigiit akornanni peqqinnissami ajornartorsiuterpassuit, sulisut nikerangaatsiarneri nunallu qanoq inissisimanerani avinngarusimangaatsiartoqarnera pillugu ajornartorsiuterpassuit, nunatsinni peqqinnissaqarfiup ulluinnarni unammillissutigisarpai.
Unammillernartoqangaatsiarneratali politikerit naatsorsuuteqangaatsiarnissaannut – aamma peqqinnissaqarfimmi sulisunut piviusorsiunngitsunik piumasaqaateqarnissaannut tunuarsimaartitsinngilaq.
Peqqinnissaq pillugu aqutsisoqarfiup pisortarisimasaa, Malene Marie Nielsen taama isumaqarluni Politikenip peqqinnissamut immikkoortuani oqarpoq.
- Peqqinnissaqarfiup qanoq pisinnaasaqassusaanut politikerit maaniittut piviusorsiunngitsumik isiginnittaaseqarput. suliassippallaartoqarpoq, Koldingimi tunniunneqarsinnaasutulli Upernavimmi tunniussisoqarsinnaanngilaq, tamanna paasineqartariaqarpoq, Malene Marie Nielsen Politiken Sundhedimut oqarpoq.
AAMMA ATUARUK Aqutsisoqarfiup pisortaa Peqqinnissamut Naalakkersuisoqarfimmit soraarsinneqartoq
Peqqinnissaqarfimmi suliniutit ataatsimut katiterneqassasut
Taassuma peqqinnissaqarfik nunatsinni sumiiffinnut 74-inut assigiinngitsunut agguataaqqasoq ukiuni pingasuni akisussaaffigaa.
Nakorsat peqqissaasullu taama annertutigisumi siammarteqqanerat pitsaassutsimut sunniuteqartartoq Malene Marie Nielsen isumaqarpoq.
Ernisussiorneq assersuutigigaanni, sumiiffinni tallimani maanna ernisoqarsinnaavoq. Taakkuli marluinnaanngikkunik pingasuinnaasariaqaraluartut, taanna isumaqarpoq.
- Sisimiuni ukiumut ataasiarluni pilatsilluni ernisoqartarpoq. Danmarkimi tamanna akuerineqarsinnaanavianngikkaluarpoq, aamma uanga nammineerlunga akuersaarsinnaanngilara, Malene Marie Nielsen Politiken Sundhedimut oqarpoq.
Taassuma pilatsillutik ernisartut taama akuttutigitillugit tamanna pilaalluni ernisarnerup pitsaassusaanik attassiniarnermut ajornakusoortitsisoraa.
Peqqinnissamut ataatsimiititaliarsuaq utaqqigaa
Peqqinnissaq pillugu Ataatsimiititaliarsuaq, peqqinnissaqarfimmik misissuisussaq iluarsiissutaassasoq, peqqissutsimut naalakkersuisoq, Anna Wangenheim Politiken Sundhedimut allalluni akissuteqarpoq.
- Nunatsinni maani peqqinnissaqarfimmut naatsorsuuteqaqaagut, tammanalu siullertut ajunngitsutut isigaara.
- Peqqinnissaq pillugu ataatsimiititaliarsuup peqqinnissaqarfiup aaqqissuussaaneranut tamakkiisumut, sulisussarsinissamut, sulisunik attassinissamut kiisalu Danmarkip nunallu allat suleqatigineranut naleqqussaanissat pitsanngorsaanissallu siunnersuusiussavai, Anna Wangenheim Politiken Sundhedimut oqarpoq.
Peqqinnissaq pillugu ataatsimiititaliarsuarmut ukiunut pingasunut tulliuttunut 6 millionit koruunit immikkoortinneqarnikuupput.
Malene Marie Nielsen peqqinnissaq pillugu aqutsisoqarfimmi pisortatut atuuffimminit "ineriartortitsinissamut aqutsinissamullu iliuusissaq pillugu isumaqatigiinngittoqarnerata" kingunerisaanik maajip ulluisa arfernani soraarsinneqarpoq.
AAMMA ATUARUK Suliffiup iluani misissuisoqarnerata aqutsisoqarfiup pisortaa ileqqorluttutut pinngitsuutikkaa
Taassuma soraarsitsinermut pissutaasoq Politiken Sundhedimut ilisimannginnerarpaa, soraarsitsinerli "eqqissisimasumik torersumillu" pisimasoq oqaatigalugu.
Tamatuma pinissaanut, qaammatit sisamat sioqqullugit, aqutsisoqarfiup pisortarisimasaa peqqinnissaqarfimmit isumaqatigiissutinik qassiiusunik uiminut isumaqatigiissuteqarsimanngitsutut, peqqinnissaqarfiup iluani misissuinermi pinngitsuutinneqarpoq.
Angut taanna suliffeqarfinnut arfineq-marlunnut peqqinnissaqarfimmut isumaqatigiissuteqartunut ilaavoq, misissuinerli naapertorlugu isumaqatigiissutit tamarmik malittarisassat malillugit isumaqatigiissutaapput.
