Aqutsisoqarfiup pisortaata siumoortitsisarsimaneq ilisimannginnerarpaa

Siumoortumilli akissarsitsitsisoqarsimanera Aqutsisoqarfimmit ilisimaneqarsimasoq, nakorsat peqatigiiffiannit aamma Dronning Ingridip Napparsimmavissuani nakorsaanerit oqaatigaat.

Akissarsiassanut siumoortumik, nunap immikkoortuini nakorsaanernut peqqissaasullu ningiuinut akissarsitsitsisimaneq, isumaqatigiissut suli akuerisaanngitsoq atorlugu pisimasoq, Peqqissutsimut Naalakkersuisoqarfimmi pisortap, Ann Birkekær Kjeldsenip maanna uppernarsarpaa.

- Kukkunersiuisut nalunaarusianni allassimavoq, tunngavilersuinertaqanngitsumik akissarsisitsisoqarsimasoq. Tamanna ima paasineqassaaq, pisortat aningaasaataannik atuiniaraanni pinngitsoorani tamanna tunngavilersugaasariaqarpoq, Peqqissutsimut Naalakkersuisoqarfimmi pisortaq, Ann Birkekær Kjeldsen oqarpoq.

Qullersaqarfiulli akissarsititsisimaneq ilisimasaqarfigisimagaa, Kalaallit Nunnaanni Nakorsat Peqatigiiffiata siulittaasuata, Ole Lindip aamma Dronning Ingridip Napparsimmavissuanit nakorsaanerit siunnersuisoqatigiivisa siulittaasuata, Allan Gelvadip oqaatigaat.

- Apeqqutigaat, Peqqinnissaqarfiup aqutsisoqarfia akissarsisitsisoqarsimaneranik ilisimatinneqarsimanersoq. Naamik aqutsisoqarfik ilisimatinneqarsimanngilaq, Ann Birkekær Kjeldsen oqarpoq.

Taassumalu oqaatigaa, kukkunersiuisut paasisaat naapertorlugit, Aqutsisoqarfimmi pisortat pingasut suliunnaarallarsinneqarnerat pissusissamisoortoq.

- Namminersorlutik Oqartussat suliffeqarfiani malittarisassat naapertorlugit ingerlatseriaaseq tamanna naliginnaasuulluinnarpoq, Ann Birkekær Kjeldsen oqarpoq.

Pisoq tamanna qassiiliutigineqartariaqanngikkaluartoq, Nakorsat Peqatigiiffiata siulittaasua, Ole Lind qanittukkut isummersorpoq.

Taama isumaqarneq Ann Birkekær Kjeldsenip isummerfigerusunngilaa, inatsisilerituut kukkunersiuisullu inassutissaat utaqqeqqaarniarlugu.

- Imaappoq, uanga suliassakka tunngavigalugit qanoq iliuuseqartussaavunga, tamannalu tunngavigalugu aalajangertariaqarsimallunga. Aalajangiineralu tamanna maanna oqallisiginianngilara. Soorunami taama aalajangerninnut tunngavissaqarpunga, aatsaalli inassuteqaataasussat takugukkit nassuiaajumaarlunga, Peqqissutsimut Aqutsisoqarfimmi pisortaq, Ann Birkekær Kjeldsen oqarpoq.

Taassuma maanna oqaatigisinnaannginnerarpaa, suliaq qaqugu naammassineqarluni aalajangiiffigineqassanersoq.