Aqutsisoqarfiup pisortaa Peqqinnissamut Naalakkersuisoqarfimmit soraarsinneqartoq
Peqqissutsimut Naalakkersuisoqarfiup aqutsisoqarfiup pisortaa, Malene Marie Nielsen suleqatigiunnaarpaa.
Naalakkersuisut taama tusagassiuutinut nalunaaruteqarput.
Malene Marie Nielsen peqqinnissaqarfimmi aqutsisuulluni, Peqqissutsimut Pitsaaliuinermullu Aqutsisoqarfimmi pisortaagaluarpoq.
Misissuisoqarnerani pinngitsuutinneqartoq
Taanna ileqqorluttuliorsimasutut unnerluutigineqarnikuusimavoq – suliamili pinngitsuutinneqarluni.
Pisortaasimasup uini, niuertuusoq, qassiiusunillu peqqinnisaqarfimmut sullissisartunik pigisaqartoq niueqatigisimagaa unnerluutigineqarnikuuvoq.
Suliaq taanna peqqinnissaqarfiup iluani misissuiffigineqarsimavoq – Malene Marie Nielsenilu unnerluutigineqartunut pinngitsuutinneqarluni.
AAMMA ATUARUK Suliffiup iluani misissuisoqarnerata aqutsisoqarfiup pisortaa ileqqorluttutut pinngitsuutikkaa
Suliaq taanna aqutsisoqarfimmi pisortatut soraarneranut attuumassuteqanngitsoq, Peqqissutsimut naalakkersuisoqarfik allappoq.
- Naalakkersuisoqarfiup sakkortuumik ersarissassavaa suleqatigiinnermut taamaatitsineq, Malene Marie Nielsenip inuttaanut attuumassuteqartunut, sulianut ingerlasunut imaluunniit siornatigut misissuinernut aalajangiinermut tunngavigineqanngimmata, Namminersorlutik Oqartussat tusagassiuutinut allapput, nangillutillu:
- Peqqinnissaqarfimmi ineriartornissamut aamma aqutsinissamut periusissat pillugit isumaqatigiinnginneq pissutigalugit suleqatigiunnaarniarlugu Peqqissutsimut Naalakkersuisoqarfik aalajangerpoq.
Tassungalu taarsiullugu naalakkersuisoqarfiup Jóanis Erik Køttlum peqqissutsimut aqutsisoqarfimmi pisortassarsinissap tungaanut pisortaagallartussatut isumaqatigiissuteqarfigaa.
Taanna 2012-imit 2016-imut aqutsisoqarfimmi pisortaareernikuuvoq.