Aqutsinissamut inatsisip allanngortinneqarnissaa piumasaraat

Ilimmarfiup pisortaata, rektorip, taassumalu tullersortaata, Ilimmarfimmilu ilinniarfiit immikkoortaani aqutsisut, ilisimatuussutsikkut misilittagaqasarnissaat, ilinniartoqatigiit tusagassiuutinut nalunaarusiaminni piumasaraat.

Ilimmarfimmi siulersuisunngorlaat ilinniartoqatigiinnit isornartorsiorneqarput. Siulersuisuni ilaasortat tamarmik ilinniagaqarluartuugaluartut ilisimatuussutsikkut misilittaqarnerat naammanngitsutut nalilerneqarpoq. Ilisimatusarnikkut sulinermi Ilimmarfiup siunissami inissisimanerata ajornartorsiutaalernissaa ernummatigineqarpoq.

Ilimmarfiup siulersuisuini ilaasortat amerlanerussuteqartut naalakkersuinit toqqarneqarnerat ajornartorsiutaasutut ilinniartunit tikkuarneqarpoq, ilinniartut ilinniartitsisullu toqqagaannit pinnani. Ilinniagaqartut siulersuisuini sunniuteqarsinnaanertik killerneqartutut ajuusaarutigaat, Ilimmarfimmilu ilinniagaqarfiit tamarmik siulersuisuini sinniit naammagittaalliutigalugu.