Aquarela Oscarimut innersuunneqanngitsoortoq

Oscarimut innersuunneqartussat ataasinngornermi kiisami saqqummiunneqarput. Filmili "Aquarela" Oscarimut ataatsimiititaliap Oscarimik nersornaasersinnaasaani tallimani ilaanngilaq.

Isiginnaagassiaq imermut tunngavoq ilarujussualu nunatsinni immiunneqarpoq, taanna isiginnaagassiat piviusuinnik tunngavillit 159-it akornannit Oscarimut innersuunneqarsinnaasut  decembarip qeqqani toqqarneqartut 15-it akornanniippoq.

- Uggornaqaaq, ingerlalluaraluarpugulli, Emile Hertling Peronard, Ánorak Filmimeersoq, oqarpoq, piviusulersaarullu nunarsuup sinneranut tunineqareersoq oqaluttuaralugu.

AAMMA ATUARUK Kalaallit-russit piviusulersaarutaat Oscarimut innersuussassaniittoq

Danskit Syriamiullu piviusulersaarutaat "The Cave", Oscarimut innersuunneqartunut tallimanut ilaavoq, taannalu isiginnaagassiat piviusuinnik tunngaveqartut pitsaanerpaattut toqqarneqarsinnaalluni.

Atlantikullu avannaamiut Oscarimut innersuussinerni nuannaarutissaqarput.

Islandimiummi nipilersortartup erinniortullu Hildur Guðnadóttirip, filmiliamut "Joker"-imut erinniani Oscarimut innersuunneqaatigaa. Filmi "Joker" Oscarimut innersuunneqarnerpaalluni Oscarinut aqqanilinnut innersuunneqarpoq.

Oscarinik februaarip qulingiluaanni nersornaasiisoqassaaq.