Aqua'kkut Kalaallit Nunaat kiisami tikeqaat

Skandinaviamiut nipilersortartut Aqua tallimanngornermi Nuummut tikipput aqagu arfininngornermi Katuami tusarnaartitsissallutik. Australiameeqqammerput billetit nunguttarlugit tusarnaartitsinerit annertuut arlallit ingerlatereerlugit. Maanna Nuummi tusarnaartitsisussanngorput Katuaq amerlanerpaamik 1.200-nik tusarnaartoqarsinnaasumi nipilersussallutik.

- Tusarnaartitsinerit inuppassuaqanngitsut tusarnaartitsinersuarniit nuannernerusarput. Taamatut tusarnaartitsinermi tusarnaartut isaasigut toqqarlugit isigineqarsinnaapput misigalugu ataatsimut misigisaqarluni, Lene Nystrøm oqarpoq.

Nipilersoqatigiit tallimanngornermi Katuami tusagassiortunik katersortitsipput Aqua-kkullu tikeqqammigamik nuna suna tumminerlugu paasinialeruttorpaat.

- Kangerlussuarmi kunngikkormiusut tikilluaqquneqarpugut tassami inuit kalaallit erfalasuannik aalateripput, Rene Dif oqarpoq aammalu Nunatsinnukarnissartik sioqqullugu nalusimanerarpaa Aqua-kkut qanoq nuannarisaatiginersut.

Nipilersoqatigiit tusaamasarsuanngorput 1997-mi 'Barbie girl' saqqummersikkamikku tamatumalu kingorna nuusiaat arlariit 30 millionit sinnerlugit nunarsuaq tamaat tunisaareerput. Nunarpassuarni nuannarisaaqalutik nipilersortarsimapput. Maannali eqqissiiminerusimapput Nuummilu tusarnaartitsinissamut qilanaarlutik.

- Qamuuna nungullartutut misiginartarpoq inuppassuit tusarnaartitsisaqattaarfigalugit. Maanna eqqissiimineruvugut. Tamatuma kinguneranik tusarnaartitsinerit nuannisarfiginerusalerpagut aammalu misigisimalluta tusarnaartunut tunniussaqarnissamut nukissaqarnerulluta, Lene Nystrøm oqarpoq.

Nipilersoqatigiit nammineq isumaqarput tusarnaartitsinermi nipilersullaqqinnerulersimallutik. Nipilersoqatigiit tassaapput erinarsortut Lene Nystrøm aamma René Dif, Søren Raasted pattattoq aamma Claus Norreen kitaarertoq. Aamma allanik nipilersoqateqarput katillutik 15-ullutik Nunatsinnut angalallutik.

Aquakkut tusarnaartitsisinniarlugit Katuaq 2011-ip naalernerani saaffiginnissimavoq.

- Katuaq inuussutissarsiortunut klubbiliorsimavoq. Taanna aqqutigalugu akissaqarnerulersimavugut nipilersoqatigiit tusaamasat tikisinnissaannut, Katuami sulisoq Ove Heilmann oqarpoq.

Nipilersoqatigiit taakku tusaamasaasut pinngortitarsuaq takussavaat sapaatip akunnerata naanerani umiatsiamik angalaartussaagamik.

Katuami tusarnaartitsineq aallartissaaq arfininngornermi unnukkut nalunaaqutaq 22.00.