Aqqutit imminut akilersinnaanngitsut Air Greenlandfip ikilisinniarpai

Timmisartortitseqatigiiffiup Air Greenland-ip timmisartuussiffigisartakkani imminut akilersinnaanngitsut unitsinnianngikkunigit akitsuiffiginiarpai. Air Greenland-ip Kulusummut Paamiunut Upernavimmullu timmisartuussisarnini akitsuiffiginianngikkunigit annikillisinniarpai. Taama oqarpoq Air Greenlandip tuniniaanermut nittarsaassinermullu pisortaat Christian Keldsen.
februaarip 13-at 2009 17:20

Nuup Kulusuullu akornanni timmisartuussisarnerit maannakkut akulikitsumik oqaluuserineqartartut ilagaat. Nuup Kulusuullu akornanni aqqut isorartuvoq, silalu ajoraangat unitsinneqartarluni, taamatullu ilaasut ikittuinnaasarlutik. Aamma taamaappoq Paamiunut timmisartuussisarnerit, tassunga sapaatip akunneranut arlaleriarluni timmisartuussinerit ingerlanneqartarput, Christian Keldsen oqarpoq.

Narsarsuup Københavnillu akornanni timmisartuussisarnerit siornatigut eqqaaneqareersutut angallaffiunerpaasuni aningaasaanik isertitsiffiusinnaavoq, ukiulli annerpaartaani aningaasatigut iluanaarutigineqarsinnaanani. Upernavimmut timmisartuussisarnerni ilaasut ikittuinnaasarput, silaannakkullu angallassisarnermi aningaasaatigut iluanaarutitut tunngaviussalluni ajorluni.

Timmisartuussisarnermi imminut akilersinnaanngitsut qanoq iliorfiginiarneqarnersut Christian Keldsen-imut apeqqutigaarput, akitsuiffigineqassanersut imaluunniit akuttunerusunik timmisartuussisalerniarnersut?

- Siunissami nunap ataqatigiissarneqarneranut pisortat pilersaaruteqarnerisa oqallisigineqarnissaannut piukkunnarpoq, taamaattumillu periarfissat tamaasa eqqarsaatigaavut.

Ungasinnerusoq eqqarsaatigalugu pilersaarutinik takorusuppugut, kiffartuussinermut isumaqatigiissusiornissami ilanngunneqarnissaannut tunngavissaqarniassagatta. Timmisartukkut kiffartuussinerit maannakkut ingerlanneqartutut ingerlaannassappata, tamanna aningaasarsiornikkut iluanaarutitut ingerlassinnaanngilarput, taamaattumillu periarfissanik allanik nassaartoqartariaqarpoq, soorlu kiffartuussinerit ikilisillugit, timmisartut allat atulerlugit imaluunniit timmisartuussinermi akit qaffallugit, tamakkuli tamarmik piserussussutsimut sunniuteqassapput, tamannalu suliffeqarfimmut inuiaqatigiinnulluunniit arlaannaatigut iluaqutaanavianngilaq Christian Keldsen oqarpoq.

Timmisartuussiffiusuni imminut akilersinnaanngitsutut taaneqartuni akit qaffappata, timmisartuussinerilluunniit ikinnerulersinneqarpata, kikkut eqqugaassanersut Christian Keldsenimut apeqqutigaarput.

- Tuniniagaq sunaluunniit akitsoriartortillugu pisiarineqarnissaa annikillisarpoq tamatumalu kingunerissavaa timmisartuussinermi kiffartuussinerit ikinnerulersinneqarnerisigut tamannalu sumiiffinni aalajangersimasuni najugaqartunut eqquissaaq, Christian Keldsen oqarpoq.

Pisortat namminersortullu Kalaallit Nunaanni sumiiffinni aalajangersimasuni kiffartuussinermi immikkoortinneqarnerat unitsittariaqarpoq, taamaaliornikkut pisortat namminersortullu kiffartuussinerat erseqqissumik avissaartinneqassammat, Christian Keldsen oqarpoq.

Christian Keldsen aamma oqarpoq, Namminersornerullutik Oqartussanik sullissinissamik isumaqatigiissummik isumaqatigiissuteqarnissaq sioqqullugu siunnersuuteqartoqassasoq.