Sisimiuni ingerlanneqartumik nunat tamat akornanni ulluni pingasuni ataatsimeersuarnermi aqqusernit pillugit oqallittoqangaatsiarsimavoq.
Ataatsimeersuartoqareernerata kingorna paasinarsivoq, nunanut issittoqarfiusunut allanut naleqqiullugu aqqusinniortarnertigut Kalaallit Nunaat katataangaatsiarsimasoq. Tamannalu qanoq iliuuseqarfigineqartariaqarpoq, Kalaallit Nunaanni inuussutissarsiutitigut ineriartorneq katataarujussuassanngippat, Laust Løgstrup, Sisimiut Kommune-aneersoq, taama isumaqarpoq:
Sisimiuni ataatsimeersuartoqarnerani aatsaat paasivarput aqqusinniornermut tunngatillugu nunanut issittoqarfiusunit allanit katataangaatsiarsimalluta; soorlu Rusland-imi; Olie, Gas-ilu aatsitassallu qallorneqarlutillu piiarneqartut angallassinnajumallugit aqqusinniornerit annertuut ingerlanneqaleruttorput.
Ataatsimeersuarnermi paasisatit Kalaallit Nunaannit qanoq atorneqarsinnaappat;
Sisimiuniit Kangerlussuarmut aqqusinniortoqarnissaanut kiisalu Narsap – Narsarsuup – Qaqortullu akornanni aqqusinniortoqarsinnaaneranut atorneqarsinnaapput.
-Tassa imaappa? Kalaallit Nunaanni aqqusinniortoqarsinnaaneranut tunngatillugu nunat allat misilittagaat atorlugit aqqusinnioqataarusuttorujussuanngortutit ?
Ilumut tassa taamaappoq: Aalisarneq Kalaallit Nunaanni ukiorpassuarni pingaarnersaajuaannarsimavoq,
Nunamilu inuussutissarsiutit eqqarsaatigalugit aqqusinertigut siuarsaasariaqarpugut. Nunammi allat ineriartortitsinerminni utaqqiunnanngilaatigut, aamma uagut malinnaasariaqarpugut.
Nunanut tamalaanut tunngassuteqartunik aqqusinniornermut ilisimasallit saniatigut Kalaallit Nunaanniit nunanut issittunut tunngassutilinnut ingeniøritut ilinniagaqarnerminnik naammasseqqaat marluk Sisimiuni ataatsimeersuarnermi oqaaseqartunut ilaapput. Eqqartugaasa ilagaat, Nuummi aqquserngit Avanersuarmilu aqqusineqarnikkut nunap qeriuaannartup pingaaruteqassusia.
