Aqqusinikkut angallannermi inatsisit sukaterneqarput
Biilertilluta qitequtaasaq isumannaallisaat atortartussanngorparput, meeqqat pingasut ataallugit ukiullit meeqqat issiaviini qitequtaasaqarnissaat piumasaqaataalissaaq, bilinik aqutsilluta oqarasuaatinik angallattakkanik tigummiarluta oqaloqqusaajunnaassaagut, kiisalu ingerlaartilluta bilit qullii ikumatiinnartalissavavut. Angallannermi inatsit ukiaru oktobarip aallaqqaataaniit atuutilissaaq.
Imigassartorsimagaanni 0,5 promille unioqqutitsinissamut killigitinneqalissaaq. Promille annerugaangat unioqqutitsinerillu amerliartornerat ilutigalugu pineqaatissinneqarnissap sakkortunerulernissaa naatsorsuutigisariaqarpoq, soorlu arlaleriarluni unioqqutitsisoqarpat biili arsaarinnissutaasinnaalissaaq.
Snescooterinik ingerlatsisinnaasut 18-ileereersimassapput, taamaattorli savaatillit piniartullu 16-inik ukiullit immikkut akuerisaasinnaassallutik.
Kiisalu angallannermi ataqqinninnerulernissaq pingaartinneqarnerulissaaq, soorlu pisuinnaat cykelillu aqqutaasigut immikkut allagartaqanngippat uninnganeq inerteqqutaalissaaq.
Unioqqutitsinerni taamaattuni 500 koruunit missaannik akiligassinneqarnissaq naatsorsuutigisariaqassaaq.
