Aqqusinertigut ajutoortut pingasut Aasiannukaanneeqartut
Inuit pingasut qamutinik ATV-inik taaneqartartunik arfininngornermi ullaakkut nalunaaqutaq arfineq-marlunut ajutoorput.
Politiit naapertorlugu ajutoornerat aquttup imigassartorsimaneranik pissuteqarsorineqarpoq.
Qamutini aquttoq qallumigut seeqqumigullu ajoquserpoq ilaasullu aappaa qutuujarpoq siffissamigullu napilluni.
- Ajutuungaatsiarnerat pissutigalugu Aasiaat napparsimmavianukaattariaqarsimavagut. Inuunerminnilli navianartorsiunngillat, Aasianni politiit pisortaat, Brian Thomsen oqarpoq.
Ajutoornermi aqqusinermi angallattanut allanut inunnilluunniit allanik ajoqusertoqanngilaq.
Suliamut atatillugu qanoq unnerluutiginnittoqarumaarnersoq politiit misissuinerisa aalajangissavaat.
Politiineersoq Brian Thomsen naapertorlugu aalakoorluni ingerlatsinermut, akuerineqarani ATV-mik atuinermut ingerlatsinermullu inatsisinik arlalinnik unioqqutitsinermut unnerluutiginnittoqarsinnaavoq.
