Aqqusineq nungullajuinnerusoq sipaarfiusinnaavoq

Kalaallit Nunaanni ukiut tamaasa aningaasarpassuit atorlugit aqquserngit iluarsaanneqartarput. Soorlu Nuummi ukiut tamaasaa aqquserngit asfaltii nutaamik qalleqqinneqartarput. Issittumi sanaartorneq pillugu misileraavimmi, Center for Arktisk Teknologimi ilinniartoq, Nivi Geisler, Nunatsinni aqquserngit nungullajuinnerusumik asfaltilersorsinnaalernissaat pillugu misileraanera neriunartoqarluarpoq.
februaarip 18-at 2009 16:59

Nivi Geisler aqqusinniornerni ajornartorsiutigineqartut ilaatigut imatut nassuiarpai: - Kalaallit Nunaanni ajornartorsiutigineqartut anersaraat aqquserngit ukiukkut qulloorlutillu putoortarnerat. Aasakkullu aqqusineq kissakkaanat biilit assakaasui ininittalertarlutik. Kalaallit Nunaanni sila kissangaatsiartarlunilu issittarsinnagami, ukiorlu naallugu siallertarlunilu apisarami, nunallu iluata qerinera taamaalilluni allanngorartuarluni, aputaajaatit kiisalu biilit assakaasuisa ukiorsiutit aqqusineq nungullartipallattarpaat, Nivi Geisler oqarpoq.

Nivi Geislerip ilinniarnerminut atatillugu asfalti, polymerinik, tassa sananeqaatinik allanngortitanik akoorlugu misilittarpaa, nungullajuinneruniassammat. Misilittaanerit takutippaat asfalti 12 procentimik akusaq issoraangami Nunatsinni naliginnaasumik atugaasumiit nungullajuinnerusoq. Nivi Geisler oqaluttuarpoq amerikamiu professori ilinniarfimminnut pulaarmat, Koreami misilittaasarsimanera iluaqutigalugu, paasisai issittumi atorneqarsinnaanersut misilittalersimallugit. Nivi Geislerip Sisimiuni aqquserngup nungullajaassarnera pillugu misilittaanini aasaru nangeqqissamaarpai.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq