USA-p isertortumik paasiniaasartoqatigiivisa CIA-p sorsunnermi tigusanik angallassinermini nunarput aqqusaartarsimaneraa, nunatsinni naalakkersuisuugallartut maanna paaserusulerpaat. Tamanna pillugu nutaarsiassaqartitsivik Ritzau allaaserisaqarpoq.
- Silaannakkut angallannermi isumaqatigiissutit inuillu pisinnaatitaaffii unioqqutillugit pisoqarsimassappat akuerisinnaanngilluinnarparput. Nunanut allanut naalakkersuisuugallartoq Inuit Ataqatigiinneersoq Josef Motzfeldt oqarpoq.
Nunanut allanut naalakkersuisuugallartoq aamma oqarpoq, isummersuutitik pillugit Danmarkimi naalakkersuisut USA-mut apuussinissaat naatsorsuutigalugu.
- Aamma akuerisinnaanngilarput, inuit pisinnaatitaaffiinut tunngasut nunanit tamalaanit akuerineqarsimasut unioqqutillugit nunatsinnut akunnittoqartarsimassappat. Josef Motzfeldt erseqqissaavoq.
Naalakkersuisunngortussat pisunik ilisimatinneqarnissaat kissaatigaattaaq.