Aqqartartut uuliamik assartuut misissorpaat

Aqqartartut maanna Aasianniipput umiarsuarlu uuliamik assartuut Oratank misissorlugu taanna ippassaq ullaassakkut Aasiaat eqqaanni ikkarlikkaluareersoq. Umiarsuaq nammineq kaanngarpoq, maannali aqqartartut misissoqqissaarpaat umiarsuup ingerlaqqinnissaa aalajangiiffineqartinnagu.

- Avannaani illoqarfiit nunaqarfiillu ikkummatissanik suli peqarluarput. Taamaattumik inoqarfiit ikummatissaarunnavianngillat Oratankip ikkarlinnerata kinguneranik, Peter Grønvold Samuelsen Polar Oil-imi Oratankimik attartortumi pisortaq KNR-mut oqarpoq.

Kisianni piffissami matumani illoqarfinni nunaqarfinnilu ikummatissaasiviit immerluarneqartarput ukiussamut peqqumaatissaat qulakkeerniarlugit. Polar Oil aamma isumaqatigiissuteqarpoq Baffinip kangerliumarngani uuliasiortunut ikkumatissamik pilersuinissamut. Taassuma saniatigut aamma kilisaatit orsussamik pilersortarpaat.

Oratankip ikkarlinnerata kinguneranik Polar Oilip uuliamik assartuut Orasila kujataaniittoq Baffinip kangerliumaneranut pajukkasuartippaa. Oratank aamma Orasila sineriammi ikummatissamik pilersuinermi pajuttortuupput.

Sulili nalunarallarpoq Oratank qaqugu angalaqqilerumaarnersoq.

- Aqqartartut misissuinertik ullumi naammassissavaat. Misissuinermit qanoq nalunaartoqarnissaa utaqqivarput, umiarsuarnmik Orasilamik Oratankimillu piginnittuniit M.H. Simonsenimiit Lars H. Simonsen KNR-mut oqarpoq.

Avannaani nunaqarfiit illoqarfiillu kisimik ikummatissamik ukiussamut peqqumaasertussaanngillat. Kujataani illoqarfiit savaateqarfiillu aamma ikummatissaasivii ulikkaaruserneqartussaapput.

- Umiarsuaatillit M.H. Simonsen ikummatissamik tankeqarfitsinnut pajuttorneq isumagaat. Taakkua pisussaaffigaat umiarsuarmik allamik pajuttuisitsilernissaaq Oratank angalaqqikkallartussaajunnaassappat, Peter Grønvold Samuelsen Polar Oilimiit oqarpoq.

Umiarsuaatillit M.H. Simonsenikkut 15-nik umiarsuaateqarput.