Ujaqqerivimmi ujaqqat sioqqallu sanaartornermik sulialinnut atortussiarineqartassapput. Assi: Masik

Aqqartartut suliffeqarfiutaat ujaqqeriviliorniarpoq

Aqqartartut suliffeqarfiutaat Masik ukiut aqqanillit qaangiuttullu Nuummi ujaqqeriviliornissamik takorluugartik piviusunngortilerpaat.

Nuummi ujaqqeriviliornissaq pilersaarutaavoq. 

Pinerluuteqarsimasunut inissiisarfiup avannaata tungaaniissaaq,tulattarfiliortoqassaarlu umiarsuit ujaqqanik sioqqanillu usingiaaffigisinnaasaannik.

Ujaqqerivimmi ujaqqat sioqqallu sanaartornermik suliaqartunut atortussiarineqartassapput. 

Aqqartartut suliffeqarfiutaat Masik Nuummiittoq taama pilersaaruteqarpoq. 

- Immaqa eqqumiiginarsinnaagaluarpoq, kisianni Kalaallit Nunaanni tamakkiisumik ujaqqanik amigaateqartoqarpoq. Soorlu asfaltiliornermut, betonngiliornermut imaluunniit immiinermut atortussanik. Ujaqqeriveqarnittigut toqqortaateqarsinnaavugut, aqqartartut suliffiutaannik Masik-mik piginnittoq Mike Høegh oqarpoq.

Masik aamma nammineq ujaqqanik sioqqanillu katersisartuussaaq. Suliffeqarfik Nuup Kangerluani Kangerluarsorutsimilu atortussanik katersinissamut akuersissuteqareerpoq. 

Ukioq ataaseq qaangiuppat tunisassiulernissaq neriuutigineqarpoq

Mike Høegh malillugu qangali Nuummi ujaqqeriviliornissaq kissaatigineqarpoq.

Ukiut aqqanillit matuma siorna Masik kommunimut pilersaarusiamik siullermeerluni suliassanngortitsivoq. Maannali aatsaat inissisimaffissaa nassaarinerqarpoq.

- Killiffipput nuannaarutigaarput. Neriuppugut pilersaarut tamatta iluaqutigisinnaassagipput. Umiarsuit akornusersuinatik talittarfissaannik nassaarpugut, Mike Høegh oqarpoq.

Kommuneqarfik Sermersuumi kommunalbestyrelsip pilersaarutip immikkoortua siulleq akuerereerpaa. 

- Nunaminertami sunik suliaqartoqassanersoq maanna kommunimi pilersaarummut ilassutissamik suliaqassaagut. Taanna kommunalbestyrelsimut akuerisassanngortissaaq, tusarniaassutigineqassalluni inaarutaasumillu akuersissutigineqassalluni.

- Aammali umiarsualivimmik ingerlatsinissamut akuersissummik Namminersorlutik Oqartussanit pissarsisussaavugut, tamannalu aamma piffissartuutaalaartussaavoq, Mike Høegh oqarpoq.

Neriupporli ujaqqerivissaq ukiup ataatsip missaa qaangiuppat piareerumaartoq.

Ujakkaartartut aamma inissaqassapput

Pilersaarutip inaarutaasumik akuersissutiginnginnerani kommune maannamut piumasaqarpoq.

Aqqartartut suliffiutaat ukiuni marlunnik atuuttussamik nunaminertamik tunisipput, iterngatalu tikillugulu pilersaarusiornissaa tullinnguuppoq. 

Kiisalu ujakkaartartut pisuttuartullu nunaminertami angalaarnissaminnut periarfissaqassapput.

- Ujakkaartartut snescooterertartullu klubbii oqaloqatigereerpagut. Maannakkorpiaq sisamanik ujarattarfeqareerpoq, taamaammallu akornutaanissarput naatsorsuutiginngilara, Mike Høegh oqarpoq. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat