Aqqartartup ilulissamut apornera nassuerutigaat

Tuluit sakkutuuisa aqqartartuat atomitortoq issittumi sungiusartilluni 2003-mi ilulissamut aporsimasoq, illersornissamut ministereqarfimmit ukiut tallimat nipangiusimaneqareerluni ippassaq nassuerutigineqarmat uissuummissutigineqarpoq.
maajip 13-at 2008 11:00

Aqqartartoq, HMS Tireless, apornermini kivinngilaq, oqimaaluttanulli tankeqarfimmugut ajoquserujussuarluni. Illersornissamut ministereqarfiup piumaffigineqaqaluni paasissutissat tunniuppai, paasissutissanilli allanik tuniserusunnani, issittumilu avannarlermi kujallermiluunniit aqqartartoq aporsimanersoq oqaatigineqarusunngilaq. Pisimasut pillugit paasissutissanik tunineqartussaaneq pillugu inatsit atorlugu paasissutissat pineqarput. 2003-mi maajip qaammataani pisimasoq pillugu paasissutissat, taamani ministeriunerusimasup, Tony Blairip siunnersortaanit isertuunneqarsimasut, tuluit inatsisartuini ilaasortaasimasup aviisimut Daily Mirrorimut oqaatigaa.

Aqqartartoq taamani apormat ajunaartoqanngilaq.