Aqqanilinnik ukiullip qallunaat uissuummisippai
Niviarsiaraq A-4-nik arfinilinnik titartaalluni Namminersorlutik Oqartussanut tillinniarnermik oqaluttuartoq Ekstrabladet-mi, BT.dk-mi, DR.dk-mi kiisalu aviisip Berlingskep nittartagaani allaaserineqarpoq.
Ilaatigut titartarsimavaa angut adidasinik qaqortunik qernertunik titarnilinnik atortoq.
- Titartagai isiginnaarpakka qimmeralu nassarlugu titartarsimasaa ornillugu. Erininarserianngitsorlu qimmera ingippoq nalunaarlugu nikorfaffitsinni arlaannik pisoqarsimasoq, politiit paasiniaaneranni pisortaq Johan Westen KNR.gl-imut oqarpoq.
Titartakkat taakkut niviarsiaqqat minutsip 15-it missaliorlugit titartagai aalajangiisumik uppernarsaataapput tillinniat Nuup Eqqartuussiviani eqqartuunneqarmata.
Niviarsiaqqap kinaanerata tusagassiutini saqqummiunneqannginnissaa angajoqqaavisa kissaatigisimavaat. Paasiniaanermi ikiuunnini pillugu politimester Bjørn Tegner Bay-imit 1.000 koruuninik akissarsitinneqarpoq.