Assi: Inuit Ataqatigiit

Inuit Ataqatigiit Aqqalukkuluk Fontain

Ateq: Aqqalukkuluk Fontain, Folketingskandidat, IA.

Ilinniagaq/suliffik: inu:it-mi salgssupporteri

Inuttut inissisimaneq (ilaquttat/qitornat): Averuserneq, marlunnik meeraqartoq.

Sunngiffimmi soqutigisat: Assammik arsaanneq, arsarneq aamma timigissarneq/eqaarsaarneq

Folketingimut qinigaassaguit pingaarnertut sulissutigerusutatit pingasut suuppat?

Siullertut mississorusuppara naalagaaffeqatigiinneq peqqutigalugu Danmarki anigaasatigut iluarunaaquteqartarnersoq nunatsinnut iluaqutaasussaagaluartunik. Eqqarsaatigalugu Marshallip sorsunnersuup kingulliup kingorna nunanut sorsunnermi eqqukkanut ikiorsiissutai, NATO allatigulluunnit. Isumaqarpungalu nunatsinni innuttaasut susoqarsimanerat nalunngittariaqaraat, pingaartumik namminiilivinnissap tungaanut ingerlaartilluta. Namminiilivikkutta kalaaliusugut kingumut qiviarsinnaasariaqarpugut pissutsinullu ilisimaarinnilluta.

Aappaattut Kalaallit Danmarkimut ilinniariartorusuttut pitsaasumik atugaqarnissaat anguniarlugu sinaakkutsissanik peqarnissaa. Ilinniariartussat Danmarkimi najugaqalerunik qanoq inuuniarnermikkut atugaqarsinnaanerannik sapinngisamik paasissutissanik tuniorarneqartariaqarput. Ilinniartuinnaanngitsulli aamma Danmarkimut nuunniarlutik aalajangertartut uani eqqarsaatigaakka. Ilinniarsimasutut naamassisimasunut nunarput angerlarfigeqqissallugu soqutiginarsartariaqarparput. Taamaalilluta assigiinngisuseq nunatsinni aamma inissaqartineqarnerulissaaq.

Pingajuattut angajoqqaat avissaarsimasut nunaqqatigiinngitsullu assersuutigalugu nunatsinni Danmarkimilu najugaqartunut meeqqamik pulaarsinnaanissaannut meeqqalluunniit pulaarsinnaanissaanut periarfissanik pitsaanerusunik ujartuerusuppunga. Tamatta danskisut innuttaassuseqarpugut naalagaffeqatigiikkatta. Assersuutigalugu meeraq Danmarkimi najugaqarsimappat Danmarkimut billetsisariaqassaagut, aningaasartuutit ataqatigiissaarinerillu pitsaanerusariaqarput.

Kalaallit Danmarkimi najugaqartut pitsaasumik inuuneqarnissaat qanoq ilillutit qulakkeerinneqataaffigisinnaaviuk?

Folketingimut qineqqusaarninni qineqqusaarutimma ilaanneereerpoq kalaallit Danmarkimi najugallit pitsaanerusumik atugaqartinneqarnissaat. Danmarkimiittoqarporli kalallit inuuniarnermikkut ilungersuuteqartut, taakku eqqortumik ikiorserneqartarnissaat qulakkeerneqartariaqarpoq. Assersuutigalugu danskisut oqalussinnaanngippata paasilluarsinnaasumik nutserunneqartarnissaat pisariqarpoq, nunatsinnilu pissutsinik ilisimaarinnilluartunik sullinneqartarnissaat pisariaqarpoq.

Folketingimut qinigaassaguit statministerissatut sorleq tapersersussaviuk?

Ministeriuninngortussamik aalajangersimasumik tapersersugaqanngilanga. Tamanna qinersereernerup kingorna paasinarsissaaq, kina nunatsinnut soqutiginnilluarluni sunniuteqaqataarusussinnaassanersoq apeqqutaavoq.

Isummersuutit

#FQ2019

Aaja Chemnitz Larsen, folketingskandidat for Inuit Ataqatigiit, afgiver sin stemme til Folketingsvalget i Godthåbshallen i Nuuk. Foto: Christian Sølbeck. (Foto: Christian Klindt Sølbeck/Ritzau Scanpix)

LIVE: Aki Mathilda Høegh Dam aamma Aaja Chemnitz Larsen Folketingimut qinigaapput