Aqqaluk Sørensen klubbitaamini unammeqataaqqaarpoq

1. divisionimi assammik arsartartut klubbiannut Århus Håndbold-imut isumaqatigiissuteqarluni siorna atsiornermi kingorna qaammat ataaseq qaangiutiinnartoq, nissumigut ajoquserpoq, ilaatigut seeqqumi nataqquatigut ajoquserami.

Sapaatiummalli klubbitaamini unammeqataaqqaarpoq.

- Aallarteqqinnissama taama sivisutigisumik utaqqisariaqarnera ilungersuutigeqaara, tassami Århusimut nuunnikkut pikkorinnerusut akornanni unammeqataasalernissara qilanaarisimagaluaqigakku, Aqqaluk Sørensen aviisimut Århus Stiftstidende-mut ullumi taama oqarpoq.

Århus Håndboldimi sungiusaasup ikiortaata Peter Bredalip oqaatigaa, Aqqaluk Sørensenip unammeqataasalernera klubbimut iluaqutaasorujussuusinnaasoq.

- Aqqaluk unammisartuuvoq timimigut nukittooq, sakkortuumillu isertitseriarsinnaasoq, naatsumik oqaatigalugu ilippanaatilerujussuuvoq, Peter Bredal oqarpoq.

Taassuma klubbimilu sungiusaasup Erik Veje Rasmussenip isumaqatigiissutigaat, Aqqaluk Sørensen eqqissilluni timini nukittorsaqqissagaa, taamaalilluni unammisaqattaarnissani tullerni tamakkiisumik peqataaniassammat.

Aqqaluk Sørensen Århus Håndboldimilu unammmeqatigisartagai Bjerringbro-Silkeborgimut unnugu unammissapput.