Aqqaluk Petersen Nunatsinni sillimaniarnermi teknikerit siullersaraat
Ukiuni marlunni atuareerluni suliffeqarfinnilu assigiinngitsuni sungiusaatigalugu sulereerluni, Aqqaluk Petersen sillimaniarnermi teknikeritut allagartartaarpoq. Kalaallini siullersaalluni taamatut ilinniagaqarpoq. Ilinniarninili naammasseqqajanngilaa. Ajunaarnersuarmi navianartoqarneranillu nalilersuinermi aqutsisutut ilinniaqqinniarpoq.
-Ukiuni qulini piffissap ilaani qatserisartutut sulivunga, siullermik Nuummi kingornatigullu Ålborgimi, taamaammat sillimaniarnermi teknikeritut ilinniarnissara uannut pissusissamisuuginnarpoq. Misigisarpassuupput, aamma suliffeqarfinni assigiinngitsuni sungiusaatigalugu sulinera assut kajumissisitsivoq. Ilisimasanik nutaanik pissarsiffiulluarsimapput, aappagulu atorfinittussanngoruma atorluarsinnaavakka, Aqqaluk Petersen knr.gl-imut oqaluttuarpoq.
Aqqaluup Nunatsinni sungiusaatigalugu sulinermi saniatigut ilinniartoqatimi Nunatsinni sungiusaatigalugu sulilernissaannut aqqutissiuussisimavoq, ilaatigut Kalaallit Nunaanni annaassiniarnermut sillimaniartuni, aammalu Air Greenlandimi.
-Ajunaarnersuarmi navianartoqarneranillu nalilersuinermi aqutsisutut ilinniaqqinniarlunga aalajangerpunga. Naammassiguma qatserisartoqarfimmi sulilernissannut periarfissannut iluaqutigissavara. Nuummi sulilerusuppunga, tassanimi siornatigut sulereernikuugama. Ilinniartitaaneq siammasissupilussuuvoq, aamma immikkut ilinniagassat imminut tulluutsitat toqqarneqarsinnaapput. Uanga qatserisartoqarneq toqqarpara, ilinniartoqatimmalu nunani tamalaani ikiuiniarneq imaluunniit suliffeqarfinni namminersortuni isumannaallisaaneq toqqarpaat, Aqqaluk Petersen oqaluttuarpoq. Taanna ilinniarnermi nalaani Vordingborgip kommuniata sillimaniarnermut tunngasunik pilersaarusiorneranut aamma peqataavoq.
