Aqqaluk Lynge:- Ukiuni 30-ni anguniagarput anguarput!
- Isumaqartorujussuuvoq soorunami pingaaruteqarpoq taamaattumik ataasinngorpat permanent forumimi naggataamik oqalugiarninni qulequttat annerpaartarissavaat kalaallit namminersorneq angugaat, Aqqaluk Lynge oqarpoq nangipporlu:
- Kiisalu pingaarnerpaamik inuiattut akuerineqarneq! taanna ukiut 30-it matuma siorna Inuit ataqatigiit pilersinneqarneranni aallaaviuvoq. Taakkua anguneqarnerat isumaqarpunga inuiassuarnut tamanut aamma pingaaruteqartorujussuusoq minnerunngitsumik nunap inoqqaavinut, oqarpoq.
Namminersorneq pillugu Isumalioqatigiissitami ilaasortat kalaallit danskillu suleqatigiissimanerat Aqqaluk Lynge-p aamma nersortariaqarsoraa.
- oqaatigisariaqarpoq kommissionimi kalaallit qallunaallu suleqatigiissimanerat annertoorujussuarmik nersugassaasoq. Kalaallit politikkerii partiillu tamarmik uani ataatsimoorlutik suleqatigiinnerat isumaqatigiinnerallu taanna aamma pingaaruteqarnerpaavoq, tassalu imaappoq partiitut ataasiakkaatut anguniakkat pivallaarnagit Kalaallit Nunaata ataatsimoorluni inuiattut ataatsimoornissaanik naqissusiivoq annertoorujussuarmik siunissami pingaaruteqartussaq, Aqqaluk Lynge oqarpoq.
Taanna aperaarput tamanna nunap inuiinut qanoq iluaqutaasinnaanersoq.
- Kalaallinut pingaaruteqarpoq ugguuna naalagaaffeqatigiinnerup iluani inuiattut akuerisaanermik isumaqatigiittoqarnera, oqarpoq.
Nangilluni erseqqissaavoq ukiuni aggersuni misissortariaqassagitsik nunarsuarmi suleqatigiiffinnut soorlu FN-itut ittunut Kalaallit Nunaata aallartitaqarnikkut qanoq ilillugu nukittorsarneqarsinnaanissaa.
- Taamaalillutami nammineerluta avammut kiinnersinnaanerput periarfissinniassagatsigu, taama nuannaaqaluni oqarpoq ICC sinnerlugu maannakkorpiaq Ottawamiittoq Aqqaluk Lynge.
