Aqqaluk Lynge: Taamatut naliliineq sianiilliornerungaatsiarpoq
Nunap inoqqaavisa pisinnaatitaaffiinut tunngatillugu isumaqatigiissut nunatsinnut sunniuteqarpallaarnavianngitsutut Mininnguaq Kleistimit nalilerneqareersorlu, ICC-p nunatsinni siulittaasua Aqqaluk Lynge oqarpoq isornartorsiuinissamut siusippallaartoq. Aqqaluk Lynge ima oqarpoq:
- Kalaallit danskillu akornanni suli isumaqatigiinniartoqartillugu siusippallaaluatsiarpoq taamatut naliliissalluni. Isumaqatigiinniarnernut akimmersaataasinnaavoq ajoqutaallunilu, ICC-p nunatsinni siulittaasua Aqqaluk Lynge oqarpoq, nangipporlu:
- Kalaallit soqutigisatik illersortussaavaat, aamma illersuutissatsinnik nunarsuarmi assigiinngitsunik allanik aalajangersakkanik soqanngilaq. Ukiunilu 24-ni sorsuutigisimasarput taamatut nalilissallugu sianiilliornerungaatsiarpoq, Aqqaluk Lynge oqarpoq.
- Ilisimasariaqarparput kalaallit tamatta danskit Naalagaaffiit Peqatigiit aqqutigalugit nunarput naalagaaffiup iluanut inissimmagu pisinnaatitaaffigut taamanikkut allanngorujussuarmata, taamaattumillu isumaqatigiissutip uuma toqqammavigerpiarpaa uagut nunap inoqqaavisut pisinnaatitaaffigut innarlerneqarsinnaanngitsut sumilluunniit, Aqqaluk Lynge erseqissaavoq.