Aqqaluk Lynge-p akerlilersuinera tupigusuutigineqarpoq

Allattoq Mads Lynge
juulip 30-at 2007 11:02

Mittarfissuup Stansted-ip alliniarneqarneranut pilersaarut pillugu tallimanngormat Londonimi annertuumik tusarniaasoqarmat kalaaleq soqutigineqarnerpaanut ilaavoq. Nunatsinni ICC-p siulittaasua Aqqaluk Lynge puisip amianik aatsulerluni avatangiisinik illersuiniaqatigiit nalunaajaasuatut pingaarnertut mittarfimmik allileriniarneq mingutsitsisoqarnissaa pillugu akerlilersorpaa.

Suliniaqatigiiffimmit Stop the Stansted Expansion-imit Aqqaluk Lynge qaaqquneqarsimavoq. Danmarks Radiumeersoq Jakob Illeborg naapertorlugu timmisartorsualiornermik ingerlataqartut illersuisuisa Aqqaluk Lyngep mianersoqqusineri tusaanngitsuusaarniarlugit aalajangersimapput. Allaammi ilaasa apeqquserlugu tuluit oqallinneranni sooq kalaaleq akuliutissanersoq.

Oqaaseqartut ilaat ima oqarpoq:

- Londonimi sanaartugassatut pilersaaruterput pillugu oqallinnerput kalaallip sooq susassaqarfigissaneraa takujuminaatsippara. Immaqa Hr. Lyngep nammineq nunagisani aallunnerusariaqaraluarpaa uagullu Tuluit Nunaat pillugu oqallinnerput ilannguffiginagu, oqaaseqartitaq oqarpoq.

Tamanna Aqqaluk Lyngep akissuteqarfigaa:

- Oqallinnissinnut akuliuttarunnaassaqqaarpunga uannut naggueqatinnullu inuunermut tunngavissat aserorterunnaarussigik, akivoq.

Aqqaluk Lynge kingusinnerusukkut Danmarkip Radioanut Stansted-imi sooq peqataanerluni soorlu oqallinnermut ilanngunnerluni ima itisilerpai.

- Ilissitut ukiorpassuit matuma siornatigutut mingutsitsinerujussuarmut suli ingerlanneqartumut isiginnaartuuinnarusukkunnaaratta. Tamannami uumasut aalisakkallu nikittarnerannut sunniuteqartaqimmat. Taamaattumik tuluit inatsisartut tuluillu naalakkersuinermik ingerlataqartut paasissagaat pingaaruteqarpoq; namminneq nunaminni aalajangertagaat aammattaaq nunarsuarmioqatigiinnut tamanut pingaaruteqarmata, Aqqaluk Lynge oqarpoq.

Stansted-imi tusarniaasoqareerneratigut oktobarimi aalajangiisoqarallarnissaa naatsorsuutigineqarpoq.