Aqqaluk Lynge: -Killissaa tikillugu sorsussaagut!
Nunat Inoqqaavisa Pisinnaatitaaffii pillugit Nalunaarut Naalagaaffiit Peqatigiinnit akuerineqanngitsooraluartoq suli neriuutissaqarpoq. Taama oqarpoq ICC-p Kalaallit Nunaanni siulittaasua, Aqqaluk Lynge.
Afrikami naalagaaffiit, Namibia siuttoralugu, akuersissutigineqartumik siunnersuutigaat, Nunat Inoqqaavisa Pisinnaatitaaffii pillugit nalunaarut akuersissutigineqassanngikkallartoq. Tamanna isumaqarpoq, ataatsimeersuarnerup massakkut ingerlasup naammassineqannginnerani Nunat Inoqqaavisa Pisinnaatitaaffii pillugit isummernissaq uterfigeqqinneqassasoq. Naalagaaffiit Peqatigiit massakkut ataatsimeersuarnerat aappaagu septembarimi aatsaat naammassissaaq.
- Nalunaarummut akerliusut sunnerniarnissaannut piffissaq atussavarput, Aqqaluk Lynge oqarpoq.
- Canadami Alaskamilu ICC-qarfiit kajumissaassavakka sunniiniarnitsinni pimoorullugu peqataaqqullugit. Killissaa tikillugu sorsussaagut, Aqqaluk Lynge naggasiivoq.
