Aqqaluk Lynge Greenpeacemik illersuivoq
Greenpeacemut ilaasortat Tuluit Nunaanni nukissiorfimmik aamarsuartortumik Kingsnorthimik 2007-imi matuseriaraluarnerminnut atatillugu aserorterisimasutut unnerluutigineqarnerminnit pinngitsuutitaapput.
Unnerluutigineqarnerannut pissutaavoq nukissiorfiup pujoorfianut, 200 meterinik portussusilimmut, CO2-mik aniatitsinermut tunngasunik naqinnernik angisuunik allattuisimammata.
Akerliuniarnermut pissutaavoq, Tuluit Nunaanni ukiut 30-t ingerlanerini kingumut aamarsuartortumik nukissiorfiliortoqarniarnera.
Eqqartuussivimmi pinngitsuutitsinermut patsisaavoq, eqqartuussivik isumaqarmat, Greenpeacemut ilaasortat iliuuseqarnermikkut pigisamik nalitunerusumik illersuiniarsimanerat – tassa nunarsuaq, silap pissusaata allanngoriartorneranut illersorniarsimammassuk.
Eqqartuussinermi ilisimannittutut nassuiaatinneqartut ilagaat ICC-p nunatsinni siulittaasua Aqqaluk Lynge, taassuma CO2-mik aniatitsinerup Issittumut sunniutai allakkatigut nassuiaateqarfigai.
- Ilisimannittutut nassuiaateqarninnut atatillugu Tuluit Nunaanni Greenpeacemut ilaasortat uagullu Issittormiut akunnitsinni oqaloqatigiinneq aallartipparput, eqqartuussinerup inerneranut oqaaseqaateqarluni Aqqaluk Lynge taama oqarpoq.
