Aqqaluk Lynge Alaskamut oqalugiariartoqqusaavoq

oktobarip 19-at 2005 10:51

ICC-p Nunatsinni siulittaasua Aqqaluk Lynge maanna Alaskamiippoq oqalugiariartorluni.

Aqqalu Lynge Alaskami nunap inoqqaavisa kattuffiata Federation of Natives-ip ataatsimeersuarnerani immikkut oqalugiartussatut qaaqqusaavoq.

Aqqalu Lynge aqagu oktoberip 20-iani oqalugiassaaq, taassuma oqalugiaatigissavaa, FN-imi Nunat Inoqqaavisa Isummersoqatigiiffianni Permanent Forum-imi ukioq manna januaarip aallaqqaataani ilaasortanngornini nassuiaateqarfigissallugu.

- Soorunami Isummersoqatigiiffimmi Permanent Forum-imi maannamut suliatta killiffiat minnerunngitsumillu siunissami sunik suliassaqarnerluta nassuiaateqarfigissavakka, Aqqaluk Lynge oqarpoq.

Taassuma nunarsuarmi nunat inoqqaavisa atugaasa pitsanngorsarnissaat nunarsuarmioqatigiinnit paasineqarnerulluni suleqataaffigineqarnissaa naggueqatigiit Inuit pingaartikkaat oqaatigisassaasa ilagissavaat.

- Nunarsuarmioqataasutut illersoqatigiinnissarput pingaaruteqarpoq, tamanna ataatsimooruttariaqarparput, Aqqaluk Lynge oqarpoq.

Taamatuttaaq Alaskami nunat inoqqaavisa kattuffitsik aqqutigalugu Isummersoqatigiiffimmut ilaasortanngornissaat tassa Permanent Forum-imut ilaasortanngornissaat Aqqaluk Lyngep kajumissaarutigilersaarpaa.