Aqqaluartaa siuariarujussuarpoq
Aqqaluartaa Olsen Sisimiuneersoq inuusuttut sisoraaserlutik ooqattaasarlutik VM-qarneranni normu 41-nngorpoq peqataasunit 95-init 15 kilometerimut saarlisaarluni unammisoqarmat Tjekkiemi illoqarfimmi Nove Mesto-mi.
Aallaammi qinngutitaa inissilluarsimavaa pallorluni seqqornerni uniunngivikkami. Tamanna pissutigalugu siullermik kaajallannermi Aqqaluartaa Olsen normu 16-itut inissisimavoq. Nikorfallunili ooqattaasarnermi pingasoriarluni uniorpoq taamalu unammineq naammassimmat normu 41-tut inissilluni. Tamanna 10 kilometerimut unamminermit assut pitsanngoriaallanneruvoq tassanimi normu 74-tut inissikkami.
- Aqqaluartaa Olsenip angusaa Grønlands Biathlon Forbundimiit naammagisimaarluarparput. VM-qartoqarnerani peqataasut affaasa pikkorinnerit akornannut inissinneq angusaavoq pitsaasoq, taama Grønlands Biathlon Forbund nalunaarpoq.
- Sisoraaserluni ooqattaasartarneq ukiut kingulliit ineriartorfiuvoq nunarpaalussuit pimoorussillutik timersuut taanna siuarsarniarmassuk, taama sisoraaserlutik ooqattaasartartut nalunaarput.
Aqqaluartaa Olsen maanna Norge-mut ingerlareerpoq tassani atuaataa sungiusarnini ingerlallugu. Maanna piareersarfigilerpaa inersimasuni VM-qataanissani Ruslandimi illoqarfimmi Khanti Mansiysk-imi februaarip naanerani ingerlanneqartussamut.