- Inatsisip siunertarivaa kalaallit qimmiat illersugaassasoq, taannalu inatsini naammattumik tunngavissaqanngittoq maannakkut paasereerparput, Aqqaluaq B. Egede (IA) Qanoruummut oqarpoq. Assi: KNR

Aqqaluaq B. Egede qimuttoqarnermut inatsimmik sukateriniarpoq

Nunatsinni qimmit qimuttut inatsisitigut illersorneqarnerat naammagigalu aalisarnermut piniarnermullu naalakkersuisoq inatsisinik pitsanngorsaataasinnaasunik misissuiniarpoq.

Nunatsinni qimmit qimuttut allamiut qimmiinik akuneqaqqusaanngillat. Qimuttut illersugaapput. Taamaakkaluartoq qimuttut allanit akusat takornartaanngillat.

Taamaammat qimussertartut kattuffiat KNQK isumaqarpoq inatsisit qimmit qimuttut akuneqannginnissaannik qulakkeerisussat sakkukippallaartut.

AAMMA ATUARUK Qeqertarsuarmiut Avannaata Qimussersuanut peqataaqqissinnaalertut

Taamalu isumaqarnerat aalisarnermut piniarnermullu naalakkersuisumit ilalerneqarpoq:

- Kalaallit qimmiisa illersugaanissaat inatsimmi siunertaavoq, taannali naammattumik tunngavissaqanngitsoq maanna paasereerparput, Aqqaluaq B. Egede (IA) Qanoruummut oqarpoq. 

Siunnersuut upernaamut piariissaaq

Qimuttut pillugit inatsisissatut siunnersuummik suliarineqaleruttornini Aqqaluaq B. Egedep oqaluttuaraa

- Taamaammat, qanoq ililluta pitsaanerpaamik illersuinissaq anguniarlugu aamma akusisoqarsimassagaluarpat iliuuserineqartussanik suliaqarpugut.

Inatsisartut aappaagu upernaakkut ataatsimiinneranni inatsisissatut siunnersuummik saqqummiussinissani Naalakkersuisup naatsorsuutigaa.

Malittarisassat paatsoorneqarsinnaajunnaarlugit inatsisiliunneqarnissaat siunertaasoq, taassuma aamma oqaatigaa.

- Assersuutigalugu piffissami qaangiuttumi nalaatarput unaavoq: Taamatut pisoqarpat kia sukkanerpaamik qisuariarfigissavaa, qimmimik toqutsisoqartariaqalissappat kia tamanna sukkanerpaamik qisuariarfigissavaa, Aqqaluaq B. Egede oqarpoq. 

- Qimmeq illersugaagami taamaammat nunatta qimmia aamma kulturikkut kingornussanik arlalinnik nassataqarpoq. Pitsaanerpaamik illuatungeriit tamarmik qimmeqartoq aammalu akusaqarsimappata akusisup qanoq periuseqarfigineqarnissaanut tunngasut tamarmik qulaarneqarnissaat Naalakkersuisuniit suliaraarput.

AAMMA ATUARUK Qimussertartut unammeqataasinnaalernerat assigiinngitsumik tiguneqartoq

- Taamalilluni kommunit ajornannginnerusumik iliuuseqalertorsinnaanermut periarfissat isiginiarlugit inatsisit suliarineqarput.

Qeqertarsuarmi qimmit qimuttut pillugit suliaq 2018-imi aallartippoq.

Taamani qimmilik Qeqertarsuarmut qimminik allanartanik eqqussisimasutut pasineqarpoq. Pasilliutigineqartullu DNA-nik misissuisoqareernerata kingorna 2019-ip naajartulernerani uppernarsarneqarput.

Suliarlu 2018-ip ukiarnerani saqqummiunneqaqqaarmat Qeqertarsuarmiut qimussertartut Avannaata Qimussersuanit ilaatigut mattunneqarput, KNQK-mimmi ilaatigut ernummatigineqarmat kalaallit qimmiat qimuttoq allanartanik akuneqarsinnaasoq.

Qimmit akusatut pasineqartut marluusut aappaata DNA-vanik misissuinerit kingorna takutippaat allanartamik akusaasoq. Qimmip aappaa misissuiffigineqanngilaq, misissuinerit aallartinneranni toqunneqareersimammat. 

Qeqertarsuarmiu qimussertartoq, qimminik allanartanik qimuttunut akusisoq, KNQK-p aaqqissuussaanut tamanut siorna ukiuni tallimani peqataasinnaajunnaarsinneqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat