Aqqaluaq B. Egede: Aalisarnermut naalakkersuisoq aalisartunik salloqittaasimavoq

Aalisarnermut naalakkersuisoq, Karl Lyberth (S), Qanoruumi ippassaq apersorneqarluni ima oqarpoq:

- Qeqertarsuup tunua eqqarsaatigalugu, imaluunniit qaleraleqarfiit taakku pingasut eqqarsaatigalugit, takorloorparput siunissami qaleraleqarfinni taakkunani pingasuni najugallit eqqaminni taamaallaat aalisarsinnaatitaassasut. Imatut paasillugu, soorlu Upernavimmiut Qeqertarsuup tunuanut aalisariartarunnaartassapput, Karl Lyberth taama oqarpoq.

Inatsisartunut ilaasortap Inuit Ataqatigiinneersup, Aqqaluaq B. Egedep tamanna aalisartunik salloqittaasimanertut nalilerpaa:

- Aalisarnermut Naalakkersuisup aalisartunik inuussutissarsiutaarutsitsiniarnera ersersitsivoq naalakkersuisup aalisartunik salloqittaasimaneranik. Tassami Aalisarnermut Naalakkersuisup aalisartut inuussutissarsiuteqarnerat siunissami atuuttuartussatut qulakkeerunneqarnissaa qineqqusaarnermi sukataarutigaa. Ippassarlu Qanoruumi oqaaseqarnermini erseqqissumik oqaatigaa aalisartut Aasiammiut aalisarnermik inuussutissarsiummit ilaajunnaarsinneqassasut.

- Pilersaarutit imatut isikkoqarput, Qeqertarsuup tunuani kujammut killeqarfik Kangaatsiap kujataatunginnguanit avannarparterniarparput Aasiaat avannaatungaanut inissillugu. Qeqertarsuup tunuani Aasiammiut Kangaatsiarmiullu aalisartunut ilaajunnaartillugit, Karl Lyberth oqarpoq.

Tamanna Aasianni aalisartut peqatigiiffianit aamma tupaallaatigineqarpoq:

- Ajuusaarnaraluarpoq Naalakkersuisut taamatut siunniussaqarsimagunik Qeqertarsuup tunuarmiutut taagortuarlutalu Qeqertarsuullu tunuani qaleralinniarsinnaatitaajunnaarsitaassagutta. Uanga nammineq inuttut akueriuminaatsippara, Karl Bourup, Aasianni aalisartut peqatigiiffianni siulittaasoq oqarpoq.

- Pissaanermik tigusinissaq pingaarnertut anguniagaasimagunarpoq, inuiaqatigiit pisariaqartitai Siumullu qineqqusaarutigisimasai ullumikkut qatangiinnartinneqarsimasutut oqaatigineqarsinnaalermata. Taamaammat isumaqarpunga Aalisarnermut Naalakkersuisup taamatut qisuariaateqarnera Siumup partiitut akisussaassusilimmik tigusariaqaraa.

Taamaammat isumaqarpunga Siumup naalakkersuisunik tatiginninnginnerminik oqariartuuteqarnissaa pissappat, tamanna akisussaassuseqartumik iliuuseqarnertut isigineqassasoq. Ilumoorsinnaanngilarmi Siumup Inatsisartuni ilaasortaatitaasa Aalisarnermut Naalakkersuisup Qanorooq-mi oqaatigisai akuerissappatigit. Taamaattoqassappat inuiaqatigiit sallusumik qineqqusaarfigineqarsimassapput, Aqqaluaq B. Egede naggasiivoq.