Aqisserniarneq inuusuttuaqqanut kingunerlorujussuangajattoq

Qaqortup eqqaani qaqqami inuusuttuaqqat tallimat sapaatip akunnerata siuliani aqisserniaatigalutik ukalerniarnerat Nunatsinni politimesterip taama oqaluttuaraa.

Inuusuttuaqqat tamarmik qorortuumik nassataqarput, aqqutaanilu aallaasit pinnguaralugit niaqqummi saneraatigut seqqortarsimapput.

Piffissap ilaani nukappissat ilaat ukioqatimi tungaanut qorortuumik ataataminik atukkaminik umerpoq.

Nukappissap qorortooq isumannaaqqasimasoraa tassanngaannartumillu ikinngutimi tungaanut seqqoriataarpoq.

Seqqunngitsiartoq ikinngutaata niaqquni iluatsitsinikkut nikisissivaa taamaalillunilu siutimigut taamaallaat eqqortilluni, Qaqortumi politiinit Stine Egede oqarpoq.

- Pinnguarnerli ulorianartorujussuusoq Stine Egedep erseqqissaatigaa.

Meeqqat 12-inik ukioqaleraangamik qorortuuaqqamik atuisinnaatitaalertartut politiit erseqqissaatigaat, taamaakkaluartorli angajoqqaat meeqqaminnut aallaammik atortitsiniaraangamik mianersortumik iliuseqarnissaat pingaaruteqarpoq. Inuusuttullu qortortuunik atuinissamut ilinniartilluarneqartarnissaat aamma pingaaruteqarluni.

Sapaatip akunnerata siuliani pisoq ajornersumik kinguneqanngilaq – Qaqortumili politiit ukialernerani atuanngiffeqarnerup nalaani qorortuut iluamik atornissaat pillugu meeqqat atuarfiani atuartunut angajullernut saqqummiussiniarput.