Aqerloq niaquanut 5 centimeterisut ititigisumik pulasoq
Aqerloq isaata saamerliup qingaatalu akornannut tuppoq, 5 centimeterisullu ititigisumut pulalluni, qujanartumilli angutip inuunera ulorianartorsiunngilaq, isaalu ajoquserani.
Aasianni napparsimmavimmit oqarnerattut, tamanna aqerlup sequmissimannginneranik peqquteqarunarpoq.
Angut 45-nik ukiulik, taanna qallunaajusoq sulisartoq, ikinngutini pingasut ilagalugit arfernik qinaasinerani piaarinaatsoortumik aallaaneqarpoq.
Aasianni politiit isumaqarput, piniartut ilaata Maniitsup, Aasiannit 7 kilometerisut avannarpasitsigisup, saqqaani puisinniartilluni igeriarsimassasoq.
- Isumaqarpugut, puisi, umiatsiap, angutip 45-nik ukiullip issimaffigissaata umiatsiallu, 500 meterisut ungasitsigisumiittup, akornanniittoq igeriarfigineqarsimassasoq, Aasianni politiit ulluinnarni aqutsisuat, vicepolitikommisær Aqqaluk Petersen, oqarpoq.
Angutip 45-nik ukiullip eqqorneqannginnerani, taassuma ikinngutaasalu seqqorpallak tusarpaat, aallaqqaammullu isumaqaraluarput, isaa qaartoq, Aqqaluk Petersen nangilluni oqaluttuarpoq.
Politiit umiatsiaq aallaammik igitsiffiusoq ippassaq ujaraluarpaat, iluatsinnaguli. Maannalu ujarlernermilli takunnissimasinnaasunik ikiortissarsiorput.
Politiilli qularutigivallaanngilaat, angut 45-nik ukiulik piarinaatsoornikkut eqqorneqarsimasoq. Pisuusoq nassaarineqarluni eqqartuussuvimmut tunniunneqassagaluarpat, taama ilimaginninneq sunniuteqassaaq.
Kisianni aallaasisornermi mianersorluinnartarnissaq pisariaqartoq, Politiit pisoq una allaavigalugu eqqaasitsipput.