Aqajarua sukateriffiginiarneqarpoq
Aqajarua angallatinik angallaffigineqartorujussuuvoq tamannalu pissutaasorineqarpoq timmissat ikiliartornerannut. Qeqertarsuullu kommunerisimasaata Namminersornerullutik Oqartussanut saaffiginnissutiginikuuaa Aqajaruani sukaterisoqartariaqarnera innersuussutigalugu.
Imaanngilarli eqqissititsigaanni tamakkiisumik matusisoqassasoq kisiannili akornutaasut annikillisinnissaannut iliuuseqartoqarsinnaavoq, Namminersornerullutik Oqartussat sinniisaat Inge Thaulow angalaqataasoq oqarpoq tamanna Ramsarip allatseqarfimmiuinut ilisimatitsissutigisimallugu.
Qaasuitsullu Kommunia attaviginiarneqarpoq tamanna iliuuseqarfiginiarlugu.
Ataatsimiititsisoqassaaq sumiiffimmeersut atuisartut innuttaasullu akuliutsilluarlugit, tusarniaasoqassallunilu, taamaammat qanoq tamanna inaarneqassanersoq suli oqaatigineqarsinnaanngikkallarpoq, Inge Thaulow oqarpoq.
Saqqami piniartoq Ole Zeeb attavigigatsigu oqarpoq isornartorsiutip illuatungaanik mitit avaqqunnerulernikuusut takunerusalernikuugamikkit timmissat ikiliartortutut oqaatigisinnaanagu. Erseqqissaatigaattaaq annerusumik Iluliarmiut Aqajaruanik atuisuusut.
