Aqagu taasisitsinissaq nunarsuup sinnerani maluginiarneqarpoq

Nunat eqqumiiginarsinnaasut ilaanni Adzerbaijanimi Asiamiittumi nutaarsiassaqartitsivik Trend News allaaserisamini, tyskit nutaarsiassaqartitsiviat DPA issuarpaa, aningaasaqarneq pillugu ilisimatooq Christen Sørensen aamma inatsisartuni folketingimilu ilaasortaq Lars-Emil Johansen oqaaseqartillugit.

Christen Sørensenip oqaatigaa, Kalaallit Nunaata aningaasarsiornikkut namminiilivinnissaanut aqqutissiuussisussat ilagigaat uuliamik aatsitassanillu pisuussuterpassuaqarunarneqarnera. Aammali eqqaasitsissutigaa, Kalaallit Nunaanni ilinniarsimasunik sulisussanillu sumi suliffissaqarneq apeqqutaatillugu nuttarsinnaasunik amigaateqarnerit. Christen Sørensenip aamma ilimagaa Danmarkip Euro ukiut arlaqanngitsut qaangiuppata atuleriarpagu Kalaallit Nunaat malinnaajumaartoq.

Adzerbaidjanimiut nittartagaanni aamma Lars-Emil Johansen issuarneqarpoq.

- Neriuppunga Kalaallit Nunaat ukioq 2021-imi, Hans Egedep tikinneranit ukiut 300-nngorneranni Namminiilivissimassasoq, Lars-Emil Johansen oqarpoq.

USA-mi nittartakkami nutaarsiassaqartitsivik Current TV Kalaallit Nunaat pillugu minutsinik 20-inik sivisussusilimmik aamma paasissutissiivoq, tassani Namminersorneq pillugu taaasisitsilerneq sukumiisumik eqqartorneqarluni. Avatangiisit pillugit tusagassiisartoq Adam Yamaguchi aasaq nunatsinniissimasoq Namminersornermut eqqarsaatit silallu pissusaata allanngoriartornerata sunniutai, ajortortai ajunngitsortaalu, pillugit eqqartuivoq.