Aqagu "Inuit" ulluat

Alaskami naggueqatigut inuppiaat, siullermeerutaasumik, inuit ulluannik taallugu aqagu novemberip ulluisa arfineq aappaanni ullorsiussapput. Ulloq taanna qanga Inuit Issittormiut kattuffiannik taaguuteqartup ICC-ip aallaarniisuata Eben Hopson-ip inuuvigaa. Nunatsinni Inuit Issittormiut siunnersuisoqatigiiffianni siulittaasoq Aqqaluk Lynge aperaarput nunatsinni inuit ulluannik taallugu ullorsiortalissanersugut Aqqaluk Lynge-lu ima akivoq..

- Tamanna pisariaqartinneqarmat aasaq Issittormiut siunnersuisoqatigiiffiat ataatsimeersuarnermini aalajangiussaqarpoq, anguniarneqassasoq novemberip arfineq aappaat, inuit ulluattut inoqarfinni nalliussineqartalissasoq, Aqqaluk Lynge oqarpoq.

Erseqqissaavoq nunatsinni suli taamaaliussanngikkallartugut nunatsinni pisortat aqqusaarneqaqqaartussaammata.

- Inatsisartut naalakkersuisullu aalajangiiffigisussaavaat peqataassanersugut, peqataanissarpullu qanoq isikkoqassanersoq, oqarpoq.

Erseqqissaavoq una ulloqartitsineq pineqartoq allanut ullorsiornernut unammillertuusussaanngitsoq.

Aqqaluk Lynge aperaarput siunissami tamanna pillugu sulinngiffeqartoqartassanersoq.

- Alaskami aqagu Alaskap naalagaaffiata governørip ullorsiorneq nalunaarutigisussaavaa, taamaattumik Alaskami pingaartinneqartorujussuuvoq. Nunatsinni apeqqutaavoq qanoq tamanna malunnartinniarneqassanersoq uagut nammineq inuiaassutitsinnik ulloqarpugut, aamma danskit peqatigalugit inatsisitaarfik juunip tallimaani ullorsiortarpoq, oqarpoq.

Nangilluni erseqqissaavoq ullormi tassani sulinngiffeqartitsisoqarnissaanik innersuussuteqarusunnatik.

- Inuiaqatigiit tamarmik ulloq taanna pillugu oqaloqatigeeqqaartariaqarput, kalaallit namminneq aalajangissavaat ullorsiorneq taanna qanoq pissanerlugu, nunatsinni Inuit Issittormiut Siunnersuisoqatigiiffianni siulittaasoq Aqqaluk Lynge oqarpoq.

Naggueqatigut Alaskamiittut inuppiaat arfininngormalli inuit ulluannik taallugu malunnartitsiniaalerput, inuit timersuutaannik unammillutik, ullumikkullu tamanut ammassumik kulturikkut sammisassaqartitsineqarpoq aqagulu

Inuppiaat oqaasii atisaallu pillugit ulloqartitsineqassalluni.