Aqagu aamma aallanngitsoortoqassaqaaq

Islandimi qaqqap innermik anitsisartup, Kalaallit Nunaanni timmisartorneq akornusersoqqilerpaa. Ullumi arfinngornermi piffinnut arlalinnut timmisartornissaraluit unitsinneqarput, Air Greenland nalunaarpoq.
maajip 08-at 2010 16:54

Kulusuk, Tasiilaq, Narsarsuaq, Narsaq Qaqortoq aamma Nanortalik timmiffigineqarsinnaanngikkallarput.

Nuummiit Narsarsuarmut timmisartornissaq unitsiinnarneqarpoq taamatullu Nuummiit Kulusuliartussaq unitsiinnarneqarluni. Kalaallit Nunaata kujataani illoqarfinni tamani timmisartortoqassanngilaq.

Timmisartoq Nuummiit Kulusuliartussaq aqagumut, quligiluat qaangerlugu tanneq pingasup tungaanut kinguartikkallarneqarpoq. Nuummiit Keflavikiliartoq ullaakkut quligilunut aallassasoq Air Greenlandip nalunaarutigaa, allannguutaavorli Keflavikkimut minnani Akureylimut missasoq, tassanngaaniillu ilaasut bussinik Reykjavikkimut ingerlanneqassapput.

Air Greenlandip innersuussutigaa ilaasussat aallanngitsoortut, airgreenland.gl alakkarlugu paasiniaasassasut.