Sikkilertartoq Apuuffissannut apuuppunga

Qallunaaq sikkilertartoq Emil Hvidtfeldt Finlandimiit siorna aallarami ukiumi ataatsimi angalareerluni Indonesiamut pingasungormat apuuppoq. Taassuma sikkilerluni angalanermigut Peqatigiiffik Kalaallit Meerartai aningaasanik katersissuppai.
Unnuk taanna Emil Jakartamut tikikkami. Assi: Emil Hvidtfeldt.
Emil Ækvatorimi Assi: Emil Hvidtfeldt.
Aqqusinikkut Palmeqarfiusukkut sikkilerneq. Assi: Emil Hvidtfeldt.
Aqqut sikkilerfigisap ilaa. Assi: Emil Hvidtfelt.
Illorsuarujussuaq Emilip sikkilernermini assilisaasa ilaat. Assi: Emil Hvidtfeldt.
Allattoq Anna P. Knudsen
maajip 12-at 2019 14:40

Qaqqat portusuut, illoqarfiit, illoqarfeeqqat, akunnittarfiit assigiinngitsut aqqusaareerlugit inuppassuillu naappereerlugit angut qallunaaq nunatsinnut ikiuerusuttoq angorusutaminik piviusunngortitsivoq.

Sikkilertartormi 18000 kilometerit sinnerlugit isorartussusilimmik sikkilereerluni apuuffissaminut, tassalu Indonesiami Jakartamut apuuppoq, misigisarlu nuannerluinnartuusoq taanna oqaluttuarpoq:
 - Misigisaq angeqaaq. Inuiaqatigiit eqqaassutissaataannukarpunga uninngajartorlunga, tamaani tikiffiga qimerloorlugulu assilivara. Angalanermalu naammassinera naammagisimaarpara, sikkilertartoq Emil Hvidtfeldt taama oqarpoq.

AAMMA ATUARUK Kalaallit inuusuttaat pillugit Finlandimit Indonesiamut sikkilertoq

Nunavissuarni marlunni nunat 26-it aqqusaarlugit qaammatini arlalinni sikkilerluni ingerlaarpoq. Taassuma Finlandimiit Indonisiamut angalanermini anguniagaraa tapeerusuttunit aningaasanik katersissalluni, aningaasallu katersani 64.000 koruunit sinneqartut Peqatigiiffik Kalaallit Meerartaannut tunniutissallugit.
- Soorunami Peqatigiiffik Kalaallit Meerartaannut aningaasat tunniutissavakka, tamanna maajip 21-ani pissaaq. Aningaasat neriuutigisanniit amerlanerujussuupput.  Assorsuaq tupinnarpoq, Emil Hvidtfeldt oqarpoq.

Taasuma angalanera naggaserlugu ullumi sapaammi, Jakartami qallunaat aallartitaqarfiani ulloq malunnartinneqassaaq.
Københavnimilu maajip ulluisa 21-ani ilassinninnertalimmik Peqatigiiffik Kalaallit Meerartaanut aningaasat tunniunneqassapput, tungaanullu nittartakkakkut www.theoddtrip.com -kkut  tapiisoqarsinnaasoq Emil Hvidtfeldt oqarpoq.
 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq